અમદાવાદ: ગુજરાત ભાજપના નવનિયુક્ત પ્રભારી તરુણ ચુગ બે દિવસની ગુજરાત મુલાકાતે અમદાવાદ પહોંચ્યા છે. પ્રભારી તરીકે નિયુક્તિ બાદ ગુજરાતની આ તેમની પ્રથમ મુલાકાત હોવાથી અમદાવાદ એરપોર્ટ પર તેમનું ભવ્ય સ્વાગત કરવામાં આવ્યું હતું.
એરપોર્ટ પર ગુજરાત ભાજપ પ્રદેશ પ્રમુખ જગદીશ વિશ્વકર્મા, પ્રદેશ મહામંત્રી અનિરુદ્ધ દવે સહિત પક્ષના આગેવાનો અને કાર્યકરોએ તરુણ ચુગનું સ્વાગત કર્યું હતું. ત્યારબાદ તેઓ ભાજપના પ્રદેશ કાર્યાલય કમલમ ખાતે પહોંચ્યા હતા.
કમલમ ખાતે તરુણ ચુગે રાજ્યભરમાંથી આવેલા ભાજપના જિલ્લા અને મહાનગર પ્રમુખો તેમજ સંગઠનના પદાધિકારીઓ સાથે બેઠક યોજી હતી. આ બેઠકમાં સંગઠનની કામગીરી અને આગામી કાર્યક્રમોને લઈને ચર્ચા કરવામાં આવી હતી.
મુખ્યમંત્રી સહિત સમગ્ર કેબિનેટ સાથે બેઠક
બપોર બાદ અમદાવાદના ટાઉન હોલ ખાતે તરુણ ચુગ રાજ્યના મંત્રીમંડળના સભ્યો અને ભાજપ સંગઠનના પદાધિકારીઓ સાથે મહત્વપૂર્ણ બેઠક યોજશે. બેઠકમાં મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી સહિત સમગ્ર મંત્રીમંડળ ઉપસ્થિત રહેશે.
આ બેઠકમાં સરકાર અને સંગઠન વચ્ચેના સંકલન સહિત આગામી રાજકીય તથા સંગઠનાત્મક કાર્યક્રમો અંગે ચર્ચા થવાની શક્યતા છે.
વડનગર-વારાણસી સંપર્ક યાત્રાની તૈયારીઓની સમીક્ષા
આ ઉપરાંત 17 સપ્ટેમ્બરે વડાપ્રધાન નરેન્દ્ર મોદીના જન્મદિવસ નિમિત્તે ગુજરાતમાંથી યોજાનારી વડનગર-વારાણસી સંપર્ક યાત્રાની તૈયારીઓની પણ તરુણ ચુગ સમીક્ષા કરશે.
તેમની બે દિવસની મુલાકાત દરમિયાન તેઓ પક્ષના વિવિધ પ્રભારીઓ અને સંગઠનના આગેવાનો સાથે પણ મુલાકાત કરશે. ગુજરાતના નવનિયુક્ત પ્રભારી તરીકે તરુણ ચુગની પ્રથમ મુલાકાતને કારણે ભાજપ સંગઠનમાં આ પ્રવાસને મહત્વપૂર્ણ માનવામાં આવી રહ્યો છે.
