ખોટી બાતમીના આધારે નિર્દોષ સામે NDPS કેસ કરાવાયો હતો; તપાસ બાદ પોલીસે C-Summary ભરી જેલમાંથી મુક્ત કરાવ્યો
સાયલા: સુરેન્દ્રનગર જિલ્લાના સાયલા તાલુકાના કરસનપરામાં નોંધાયેલા NDPS કેસમાં ચોંકાવનારો વળાંક આવ્યો છે. અંગત અદાવતના કારણે એક નિર્દોષ વ્યક્તિને ફસાવવા માટે તેની વાડીમાં ગાંજો મૂકી પોલીસને ખોટી બાતમી આપવામાં આવી હોવાનું તપાસમાં સામે આવ્યું છે. પોલીસે સમગ્ર કાવતરાનો પર્દાફાશ કરી બે શખસોની ધરપકડ કરી છે, જ્યારે ખોટા કેસમાં જેલમાં ગયેલા નિર્દોષ વ્યક્તિને પણ કોર્ટમાં C-Summary રજૂ કરીને મુક્ત કરાવવામાં આવ્યો છે.
અંગત અદાવત રાખી વાડીમાં મૂક્યો ગાંજો
મળતી માહિતી મુજબ, સાયલાના કરસનપરા વિસ્તારમાં રહેતા ગોપાલ સભાણી સાથે અંગત અદાવત રાખીને અરજણ ભુવા અને દેવજી મીર નામના બે શખસોએ કાવતરું રચ્યું હતું. આરોપીઓએ ગોપાલની વાડીમાં આશરે 7 કિલો ગાંજાનો જથ્થો મૂકી દીધો હતો.
ત્યારબાદ પોલીસને ગાંજાના જથ્થા અંગે ખોટી બાતમી આપવામાં આવી હતી. આ બાતમીના આધારે પોલીસે કાર્યવાહી કરતાં ગોપાલ સામે NDPS એક્ટ હેઠળ ગુનો નોંધાયો હતો અને તેને જેલમાં જવું પડ્યું હતું.
ઊંડાણપૂર્વકની તપાસમાં હકીકત બહાર આવી
કેસની ગંભીરતાને ધ્યાનમાં રાખીને બે DySP સહિતના ઉચ્ચ અધિકારીઓને તપાસમાં જોડવામાં આવ્યા હતા. પોલીસે સમગ્ર ઘટનાની ઝીણવટભરી તપાસ હાથ ધરતા બાતમી આપનારા જ લોકો કાવતરામાં સંડોવાયેલા હોવાના પુરાવા મળ્યા હતા.
તપાસમાં ગોપાલ સભાણીની આ ગુનામાં કોઈ સંડોવણી ન હોવાનું સામે આવતાં પોલીસે કોર્ટ સમક્ષ C-Summary રજૂ કરી હતી. ત્યારબાદ ગોપાલને જેલમાંથી મુક્ત કરાવવામાં આવ્યો હતો.
બે આરોપીઓની ધરપકડ
પોલીસે સમગ્ર કાવતરું ઘડનાર અરજણ ભુવા અને દેવજી મીરની ધરપકડ કરી કાયદેસરની કાર્યવાહી શરૂ કરી છે. બંનેએ અંગત અદાવતના કારણે ગોપાલને NDPSના ગંભીર કેસમાં ફસાવવા માટે આ કાવતરું રચ્યું હોવાનું તપાસમાં સામે આવ્યું છે.
તપાસ ટીમને રૂ.5,100નું ઈનામ
સુરેન્દ્રનગર જિલ્લામાં આ પ્રકારની ઘટના ચર્ચાનો વિષય બની છે. NDPS જેવા ગંભીર ગુનામાં જેલમાં ગયેલા વ્યક્તિની નિર્દોષતા તપાસમાં સાબિત થયા બાદ પોલીસે કોર્ટમાં C-Summary રજૂ કરીને તેને મુક્ત કરાવ્યો છે.
સુરેન્દ્રનગર જિલ્લા પોલીસ વડાએ સમગ્ર હકીકત બહાર લાવી નિર્દોષ વ્યક્તિને ન્યાય અપાવવામાં મહત્વની ભૂમિકા ભજવનારી તપાસ ટીમની કામગીરીને બિરદાવી છે. ટીમને પ્રોત્સાહનરૂપે રૂ.5,100નું રોકડ ઈનામ પણ આપવામાં આવ્યું છે.
