પ્લેકાર્ડ-બેનરો સાથે સૂત્રોચ્ચાર; લઠ્ઠાકાંડ અને વધતી ગુનાખોરી મુદ્દે સરકાર સામે આકરા સવાલો
ગાંધીનગરઃ ગુજરાત વિધાનસભાના ચોમાસુ સત્રના બીજા દિવસે વિધાનસભા પરિસરમાં કોંગ્રેસના ધારાસભ્યોએ સરકાર સામે ઉગ્ર વિરોધ નોંધાવ્યો હતો. રાજ્યમાં કાયદો અને વ્યવસ્થાની સ્થિતિ, દારૂબંધીના અમલ અને લઠ્ઠાકાંડ જેવા મુદ્દાઓને લઈને કોંગ્રેસે સરકાર સામે મોરચો ખોલ્યો હતો.
કોંગ્રેસના ધારાસભ્યો પ્લેકાર્ડ અને બેનરો સાથે વિધાનસભા પરિસરમાં એકત્ર થયા હતા અને સરકાર વિરુદ્ધ સૂત્રોચ્ચાર કર્યા હતા. વિપક્ષે આક્ષેપ કર્યો હતો કે રાજ્યમાં દારૂબંધી હોવા છતાં ગેરકાયદે દારૂનો વેપલો અટકાવવામાં સરકાર અને તંત્ર નિષ્ફળ રહ્યા છે.
લઠ્ઠાકાંડ અને ગુનાખોરી મુદ્દે આક્રમક વલણ
કોંગ્રેસે તાજેતરના ઝેરી દારૂના બનાવો તથા રાજ્યમાં વધતી ગુનાખોરીનો મુદ્દો ઉઠાવી સરકારની કામગીરી પર સવાલો કર્યા હતા. વિપક્ષી ધારાસભ્યોએ દાવો કર્યો હતો કે દારૂબંધીનો કડક અમલ માત્ર કાગળ પર જ રહી ગયો છે અને ગેરકાયદે પ્રવૃત્તિઓ સામે અસરકારક કાર્યવાહી થતી નથી.
આ વિરોધ પ્રદર્શનમાં કોંગ્રેસ વિધાનસભા પક્ષના નેતા અમિત ચાવડા સહિત પક્ષના વરિષ્ઠ નેતાઓ અને ધારાસભ્યો હાજર રહ્યા હતા. કોંગ્રેસના નેતાઓએ ગૃહ વિભાગ તેમજ સ્થાનિક તંત્રની કામગીરી સામે પણ પ્રશ્નો ઉઠાવ્યા હતા.
કાયદો-વ્યવસ્થા સુધારવાની માંગ
કોંગ્રેસે સરકાર પાસે રાજ્યમાં કાયદો અને વ્યવસ્થાની સ્થિતિ વધુ મજબૂત બનાવવા અને અસામાજિક પ્રવૃત્તિઓ સામે તાત્કાલિક કડક કાર્યવાહી કરવાની માંગ કરી હતી. સાથે જ દારૂબંધીના અસરકારક અમલ માટે જવાબદાર તંત્ર સામે પણ જરૂરી પગલાં ભરવા વિપક્ષે માગણી કરી હતી.
