જામનગર શહેરમાં નાગરિકોને આધુનિક, સલામત, સુવિધાયુક્ત અને પર્યાવરણને અનુકૂળ જાહેર પરિવહન સેવા મળી રહે તે માટે PM ઈ-બસ સેવા યોજના અંતર્ગત વધુ 25 ઈલેક્ટ્રિક બસોનો પ્રારંભ કરવામાં આવ્યો છે. સાંસદ પૂનમબેન માડમના હસ્તે નવી ઈ-બસ સેવાનો પ્રારંભ કરવામાં આવ્યો હતો.
આ પ્રસંગે ધારાસભ્ય દિવ્યેશભાઈ અકબરી, મેયર મોનિકાબેન વ્યાસ, ડેપ્યુટી મેયર રાકેશભાઈ ડેર, સ્ટેન્ડિંગ કમિટીના ચેરમેન ધીરેનકુમાર મોનાણી, દંડક પ્રવીણાબેન રૂપડીયા, શહેર ભાજપ પ્રમુખ બીનાબેન કોઠારી સહિતના પદાધિકારીઓ, સભ્યો અને ચૂંટાયેલી પાંખના પ્રતિનિધિઓ ઉપસ્થિત રહ્યા હતા.
25 નવી બસ સાથે કુલ 50 ઈ-બસ દોડશે
જામનગરમાં અગાઉથી 25 ઈ-બસ કાર્યરત હતી. હવે વધુ 25 બસનો ઉમેરો થતાં શહેરમાં કુલ 50 ઈ-બસ દ્વારા જાહેર પરિવહન સેવા ઉપલબ્ધ બની છે. શહેરના વિવિધ વિસ્તારોને જાહેર પરિવહનના નેટવર્ક સાથે જોડવા માટે અલગ-અલગ રૂટ નિર્ધારિત કરવામાં આવ્યા છે.
આ રૂટ દ્વારા શહેરના મુખ્ય વિસ્તારો ઉપરાંત રેલવે સ્ટેશન, શૈક્ષણિક સંસ્થાઓ, ઔદ્યોગિક વિસ્તારો, રહેણાંક વિસ્તારો તેમજ શહેર આસપાસના ગામોને પણ જોડાણ મળશે.
આ વિસ્તારોને મળશે ઈ-બસનું જોડાણ
ઈ-બસ સેવામાં સાત રસ્તા સર્કલથી વિભાપર ગામ, રામેશ્વરનગરથી મસીતીયા, સાત રસ્તા સર્કલથી ચંગા ગામ, પટેલ સમાજથી અલિયા ગામ, માધાપરથી ટાઉન હોલ, પોલિટેકનિક કોલેજથી નારણપર, હાપા રેલવે સ્ટેશનથી ગાંધીનગર રેલવે સ્ટેશન, ગોકુલનગરથી ગાંધીનગર રેલવે સ્ટેશન અને સાત રસ્તા સર્કલથી સાત રસ્તા સર્કલના સર્ક્યુલર રૂટનો સમાવેશ થાય છે.
આ ઉપરાંત દરબારગઢથી દરેડ, INS વાલસુરાથી દરબારગઢ, દરબારગઢથી સમર્પણ હોસ્ટેલ, સાત રસ્તા સર્કલથી વિજરખી ગામ, એપલ ગેટ-1થી મોટી ભલસાણ અને ટાઉન હોલથી નાઘેડી ગામ સહિતના રૂટ પર પણ સેવા ઉપલબ્ધ રહેશે.
પ્રદૂષણ ઘટાડવામાં મદદરૂપ થશે
ઈલેક્ટ્રિક બસોના સંચાલનથી જામનગરમાં પર્યાવરણલક્ષી અને ટકાઉ જાહેર પરિવહન વ્યવસ્થાને પ્રોત્સાહન મળશે. પરંપરાગત ઈંધણ આધારિત વાહનોની સરખામણીએ ઈ-બસોના ઉપયોગથી કાર્બન ઉત્સર્જન અને વાયુ પ્રદૂષણ ઘટાડવામાં મદદ મળશે. ઈ-બસો ઓછો અવાજ કરતી હોવાથી ધ્વનિ પ્રદૂષણ ઘટાડવામાં પણ યોગદાન આપશે.
વિદ્યાર્થીઓથી લઈને વરિષ્ઠ નાગરિકો સુધીને લાભ
ઈ-બસ સેવાના વિસ્તરણથી વિદ્યાર્થીઓ, નોકરીયાતો, વેપારીઓ, મહિલાઓ અને વરિષ્ઠ નાગરિકો સહિતના લોકોને દૈનિક અવરજવર માટે વધુ સુલભ જાહેર પરિવહન સેવા મળશે. રહેણાંક વિસ્તારોને શૈક્ષણિક સંસ્થાઓ, રેલવે સ્ટેશનો, ઔદ્યોગિક વિસ્તારો અને અન્ય મહત્વના સ્થળો સાથે જોડતા રૂટથી નાગરિકોની અવરજવર સરળ બનશે.
જાહેર પરિવહનના વિકલ્પમાં વધારો થતાં નાગરિકોને ખાનગી વાહનોનો ઉપયોગ ઘટાડવા પ્રોત્સાહન મળી શકે છે. પરિણામે ટ્રાફિકનું ભારણ ઘટાડવા, ઈંધણની બચત કરવા અને શહેરની વાહનવ્યવસ્થા વધુ સુવ્યવસ્થિત બનાવવામાં મદદ મળી શકે છે.
જામનગરમાં કુલ 50 ઈ-બસનું સંચાલન શરૂ થવું શહેરની જાહેર પરિવહન વ્યવસ્થાના આધુનિકીકરણ અને પર્યાવરણલક્ષી શહેરી વિકાસ તરફનું મહત્વપૂર્ણ પગલું માનવામાં આવી રહ્યું છે. મહાનગરપાલિકા દ્વારા નાગરિકોને ઈ-બસ સેવાનો વધુમાં વધુ ઉપયોગ કરવા અનુરોધ કરવામાં આવ્યો છે.
