જામનગર: શહેરમાં દારૂના દૂષણ સામે પોલીસે એકસાથે ચાર સ્થળે દરોડા પાડી કાર્યવાહી કરી હતી. પોલીસની કાર્યવાહીમાં કાર અને ઓટોરિક્ષા મારફતે થતી દારૂની હેરાફેરીનો પર્દાફાશ થયો હતો. ચાર અલગ-અલગ દરોડામાં કુલ ત્રણ શખ્સોને ઝડપી લેવામાં આવ્યા હતા, જ્યારે બે આરોપી ફરાર થઈ જતા તેમની શોધખોળ શરૂ કરવામાં આવી છે. સમગ્ર કાર્યવાહીમાં દારૂ, કાર અને રિક્ષા સહિત કુલ રૂ.3.99 લાખનો મુદ્દામાલ કબજે કરવામાં આવ્યો છે.
પ્લોટ-60માં રિક્ષામાં દારૂની હેરાફેરી ઝડપાઈ
પોલીસે પ્લોટ-60, શેરી નંબર-2માં દરોડો પાડી ઓટોરિક્ષામાં થતી દારૂની હેરાફેરી ઝડપી પાડી હતી. અહીંથી અલગ-અલગ બ્રાન્ડની રૂ.77,381ની કિંમતની 60 બોટલ મળી આવી હતી.
પોલીસે કેતન ઉર્ફે ગોપી અમુભાઈ ગજરા અને મેહુલ ગોવિંદભાઈ રાઠોડને ઝડપી લીધા હતા. બંને પાસેથી ઓટોરિક્ષા સહિત કુલ રૂ.1.82 લાખનો મુદ્દામાલ જપ્ત કરવામાં આવ્યો હતો.
શંકાસ્પદ કારમાંથી દારૂનો જથ્થો મળ્યો
બીજા બનાવમાં સિટી-એ ડિવિઝન પોલીસે રણજીતસાગર રોડ પર ગ્રીનસિટી રોડની શેરીમાં ગ્રીન એવન્યુ સામે શંકાસ્પદ કારની તપાસ કરી હતી. કારમાંથી અલગ-અલગ બ્રાન્ડની રૂ.78 હજારની 50 બોટલ તેમજ રૂ.7,446ના દારૂના 87 ચપલા મળી આવ્યા હતા.
પોલીસે રૂ.1 લાખની કાર અને દારૂ સહિત કુલ રૂ.1.85 લાખનો મુદ્દામાલ કબજે કર્યો હતો. જોકે કારચાલક પોલીસને હાથતાળી આપી ફરાર થઈ ગયો હતો.
શંકરટેકરીના વંડામાંથી 30 બોટલ મળી
ત્રીજા બનાવમાં સિટી-સી ડિવિઝન પોલીસે શંકરટેકરી વિસ્તારમાં ઈમામહુસેન પાંચ નંબરના ચોક પાસે આવેલા એક વંડામાં દરોડો પાડ્યો હતો. તપાસ દરમિયાન રૂ.22 હજારની કિંમતની 30 બોટલ દારૂ મળી આવ્યો હતો.
પોલીસ પહોંચે તે પહેલાં જ નાજીર ઉર્ફે નાજલો નુરમામદ ધોધા સ્થળ પરથી ફરાર થઈ ગયો હતો. પોલીસે દારૂનો જથ્થો કબજે કરી આરોપીને ઝડપી લેવા તપાસ હાથ ધરી છે.
સાંઢીયા પુલ પાસે 63 ચપલા સાથે એક ઝડપાયો
ચોથા બનાવમાં સિટી-સી ડિવિઝનની સર્વેલન્સ ટીમને પેટ્રોલિંગ દરમિયાન મળેલી ચોક્કસ બાતમીના આધારે સાંઢીયા પુલ નજીક સરદારનગર શેરી નં.8માં કાર્યવાહી કરવામાં આવી હતી.
પોલીસે પરેશભાઈ ભીખાભાઈ સોનગ્રાના રહેણાંકેથી અલગ-અલગ બ્રાન્ડના ભારતીય બનાવટના વિદેશી દારૂના 63 ચપલા ઝડપી પાડ્યા હતા. દારૂનો જથ્થો રૂ.10,218નો હોવાનું સામે આવ્યું છે.
પોલીસે દારૂનો જથ્થો કબજે કરી પરેશ સોનગ્રા સામે પ્રોહિબિશન હેઠળ ફરિયાદ નોંધી કાયદેસરની કાર્યવાહી હાથ ધરી છે.
ચાર દરોડામાં દારૂના નેટવર્ક સામે કાર્યવાહી
જામનગર પોલીસે એક જ દિવસમાં ચાર સ્થળે કાર્યવાહી કરીને દારૂની હેરાફેરી સામે કડક વલણ દાખવ્યું છે. રિક્ષા અને કાર મારફતે દારૂની હેરાફેરી કરનારાઓ ઉપરાંત રહેણાંક અને વંડામાં દારૂનો જથ્થો રાખનારા સામે પણ કાર્યવાહી કરવામાં આવી છે. ફરાર આરોપીઓને ઝડપી લેવા પોલીસની તપાસ ચાલુ છે.
