મોરબી જિલ્લા LCBની ટીમ પેટ્રોલિંગમાં હતી ત્યારે માળિયા મિયાણા તાલુકાના નવાગામ વાંઢ વિસ્તારમાં વોંકળાના કાંઠે દેશી દારૂની ભઠ્ઠી ધમધમતી હોવાની માહિતીના આધારે દરોડો પાડવામાં આવ્યો હતો. પોલીસની ટીમે સ્થળ પર તપાસ કરતાં મોટા પ્રમાણમાં તૈયાર દેશી દારૂ અને દારૂ બનાવવા માટેનો આથો મળી આવ્યો હતો.
દરોડા દરમિયાન પોલીસને 430 લિટર તૈયાર દેશી દારૂ અને 1400 લિટર આથો મળી આવ્યો હતો. પોલીસે બંને જથ્થા સહિત કુલ રૂ.1.21 લાખનો મુદ્દામાલ કબજે કરી આગળની કાર્યવાહી હાથ ધરી હતી.
LCBની ટીમે સ્થળ પર તપાસ હાથ ધરી હતી ત્યારે આરોપી હાજર ન હોવાથી પોલીસે નવાગામ, તાલુકો માળિયાના સમીર જાકમ જેડા સામે ગુનો નોંધી કાયદેસરની કાર્યવાહી શરૂ કરી છે. આરોપીને ઝડપી પાડવા માટે પોલીસે શોધખોળ અને તપાસનો ધમધમાટ શરૂ કર્યો છે.
પોલીસ દ્વારા દારૂની ભઠ્ઠી અંગે વધુ તપાસ હાથ ધરવામાં આવી રહી છે તેમજ આ પ્રવૃત્તિ સાથે અન્ય કોઈ વ્યક્તિ સંકળાયેલી છે કે કેમ અને દારૂનો જથ્થો ક્યાં પહોંચાડવાનો હતો તે સહિતના મુદ્દે તપાસ કરવામાં આવી રહી છે.
