ગુજરાતમાં છેલ્લા પાંચ વર્ષ દરમિયાન જીવન વીમાની પહોંચમાં નોંધપાત્ર વધારો થયો છે. FY21થી FY25 વચ્ચે વાર્ષિક પ્રીમિયમ કલેક્શન રૂ.36,175 કરોડથી વધીને રૂ.50,425 કરોડ થયું છે. રાજ્યમાં જીવન વીમા કવચ પણ રૂ.8.45 લાખ કરોડથી વધીને રૂ.11.83 લાખ કરોડ થયું છે.
જીવન વીમામાં મહિલાઓની ભાગીદારી પણ સતત વધી રહી છે. કુલ પોલિસીમાં મહિલાઓનો હિસ્સો 23.7%થી વધીને 25.2% થયો છે. જ્યારે વાર્ષિક પ્રીમિયમમાં મહિલાઓનો હિસ્સો 25.5%થી વધીને 28.1% થયો છે.
ખાસ કરીને 36 વર્ષ અને તેથી વધુ વયના ગ્રાહકોનો જીવન વીમામાં મોટો ફાળો રહ્યો છે. FY25માં આ વયજૂથના ગ્રાહકોનો ગુજરાતના કુલ વાર્ષિક પ્રીમિયમમાં 49.4% હિસ્સો રહ્યો હતો, જ્યારે પોલિસીની સંખ્યામાં તેમનો હિસ્સો 34.2% હતો.
આ ઉપરાંત 45 વર્ષથી વધુ વયના ગ્રાહકોના વાર્ષિક પ્રીમિયમમાં છેલ્લા પાંચ વર્ષમાં 59.4%નો વધારો થયો છે. તેમનો પ્રીમિયમમાં હિસ્સો 22.8% અને પોલિસીની સંખ્યામાં 11.7% રહ્યો છે.
બીજી તરફ, ટર્મ ઈન્સ્યોરન્સમાં પણ મજબૂત વૃદ્ધિ નોંધાઈ છે. FY21થી FY25 દરમિયાન ટર્મ ઈન્સ્યોરન્સની પોલિસીની સંખ્યામાં 7.5% અને વાર્ષિક પ્રીમિયમમાં 53.4%નો વધારો થયો છે. ULIPનો FY25માં કુલ વાર્ષિક પ્રીમિયમમાં 23.6% હિસ્સો રહ્યો હતો.
આ આંકડા દર્શાવે છે કે ગુજરાતમાં પરિવારોમાં નાણાકીય સુરક્ષા અને જીવન વીમા કવચ અંગેની જાગૃતિમાં વધારો થઈ રહ્યો છે. મહિલાઓની વધતી ભાગીદારી અને વધુ વયના ગ્રાહકોનો મોટો પ્રીમિયમ ફાળો જીવન વીમા બજારમાં બદલાતા વલણને પણ દર્શાવે છે.
