પોરબંદર: રાષ્ટ્રપિતા મહાત્મા ગાંધીની 157મી જન્મજયંતિ નિમિત્તે પોરબંદરના કીર્તિ મંદિર ખાતે સર્વધર્મ પ્રાર્થના સભાનું આયોજન કરવામાં આવ્યું હતું. મુખ્યમંત્રી ભૂપેન્દ્ર પટેલે બાપુની જન્મભૂમિ ખાતે પહોંચીને મહાત્મા ગાંધીને શ્રદ્ધાસુમન અર્પણ કરી ભાવાંજલિ આપી હતી.
આ પ્રસંગે મુખ્યમંત્રી ભૂપેન્દ્ર પટેલે જણાવ્યું હતું કે સર્વધર્મ પ્રાર્થના પરસ્પર આદર, શાંતિ, સમરસતા અને રાષ્ટ્રીય એકતાને વધુ મજબૂત બનાવે છે. મહાત્મા ગાંધીના સત્ય, અહિંસા, સર્વોદય અને વિશ્વબંધુત્વના વિચારો આજના સમયમાં પણ એટલા જ પ્રાસંગિક છે.
મુખ્યમંત્રીએ જણાવ્યું કે ‘સૌનો સાથ, સૌનો વિકાસ, સૌનો વિશ્વાસ અને સૌના પ્રયાસ’ના મંત્ર સાથે છેવાડાના માનવીના કલ્યાણને પ્રાધાન્ય આપવામાં આવી રહ્યું છે. ગાંધીજીના સ્વચ્છતાના વિચારોને અનુરૂપ સ્વચ્છ ભારત મિશનને જનઆંદોલનનું સ્વરૂપ મળ્યું છે, જ્યારે ગાંધીજીના સ્વરાજના વિચારને આત્મનિર્ભર ભારત સાથે જોડવામાં આવ્યો છે.
તેમણે 2047 સુધી વિકસિત ભારતના નિર્માણ માટે આત્મનિર્ભરતા, ગરીબ કલ્યાણ, સ્વચ્છતા, પર્યાવરણ સંરક્ષણ અને ‘રાષ્ટ્ર પ્રથમ’ની ભાવના સાથે આગળ વધવા સૌને આહવાન કર્યું હતું.
વન અને પર્યાવરણ મંત્રી અર્જુન મોઢવાડિયાએ પણ ગાંધીજીની સત્ય અને અહિંસાની વિચારધારા વિશ્વ માટે આજે પણ માર્ગદર્શક હોવાનું જણાવ્યું હતું. તેમણે સ્વચ્છતાને માત્ર વિશેષ દિવસની ઉજવણી પૂરતી મર્યાદિત ન રાખી તેને દૈનિક જીવનનો હિસ્સો બનાવવા અપીલ કરી હતી.
સર્વધર્મ પ્રાર્થના સભામાં ભાઈશ્રી રમેશ ઓઝા સહિતના મહાનુભાવો, અધિકારીઓ, પદાધિકારીઓ, વિદ્યાર્થીઓ અને મોટી સંખ્યામાં નાગરિકો ઉપસ્થિત રહ્યા હતા. કલાકારોએ પ્રાર્થના અને ભાવમય ગીતોની રજૂઆત કરી હતી.
ગાંધી જયંતિએ ગાંધીનગરમાં CM ભૂપેન્દ્ર પટેલે ખાદીની ખરીદી કરી
ગાંધી જયંતિના અવસરે મુખ્યમંત્રી ભૂપેન્દ્ર પટેલે ગાંધીનગરના સૌરાષ્ટ્ર રચનાત્મક સમિતિના ખાદી ગ્રામોદ્યોગ હાટની મુલાકાત લીધી હતી. તેમણે વિવિધ ખાદી વસ્ત્રોની ખરીદી કરી ડિજિટલ પેમેન્ટ દ્વારા ચુકવણી કરી હતી.
પોરબંદરના કીર્તિ મંદિર ખાતે સર્વધર્મ પ્રાર્થના સભામાં હાજરી આપ્યા બાદ ગાંધીનગર પરત ફરેલા મુખ્યમંત્રીએ ખાદીની ખરીદી કરી હતી. ‘ખાદી ફોર ફેશન, ખાદી ફોર નેશન’ના સંદેશને આગળ વધારતા તેમણે ખાદી ખરીદી દ્વારા વણાટ સાથે સંકળાયેલા પરિવારોને આર્થિક સહયોગ મળે તેવા પ્રયાસોને પ્રોત્સાહન આપ્યું હતું.
આ પ્રસંગે ઊર્જા મંત્રી ઋષિકેશ પટેલ, ધારાસભ્ય રીટાબેન પટેલ સહિતના પદાધિકારીઓ પણ ઉપસ્થિત રહ્યા હતા.
