જામનગર શહેર અને જિલ્લામાં વાતાવરણમાં આવેલા પલટા વચ્ચે મોસમી રોગચાળો વકર્યો છે. ખાસ કરીને ડેન્ગ્યુના કેસોમાં વધારો નોંધાતા આરોગ્ય તંત્ર સતર્ક બન્યું છે. છેલ્લા સવા માસ દરમિયાન શહેર અને જિલ્લામાં ડેન્ગ્યુના કુલ 22 પોઝિટિવ કેસ નોંધાયા છે, જેમાં જામનગર શહેરમાં 12 અને ગ્રામ્ય વિસ્તારોમાં 10 કેસ સામે આવ્યા છે.
શહેરમાં સપ્ટેમ્બર મહિનામાં ડેન્ગ્યુના 8 કેસ નોંધાયા હતા, જ્યારે ઓક્ટોબર મહિનામાં 6 ઓક્ટોબર સુધીમાં વધુ 4 કેસ નોંધાયા છે. જિલ્લામાં પણ ડેન્ગ્યુના 10 દર્દીઓ પોઝિટિવ આવતા આરોગ્ય વિભાગ દ્વારા અસરગ્રસ્ત વિસ્તારોમાં સર્વેલન્સ અને મચ્છર નિયંત્રણની કામગીરી તેજ કરવામાં આવી છે.
ઘરે-ઘરે સર્વેલન્સ, પોરાનાશક અને ફોગિંગ કામગીરી
આરોગ્ય કર્મચારીઓ દ્વારા અસરગ્રસ્ત વિસ્તારોમાં ઘરે-ઘરે મુલાકાત લઈ મચ્છરના સંવર્ધન સ્થાનો શોધવામાં આવી રહ્યા છે. પાણી ભરાવાના સ્થળોએ પોરાનાશક કામગીરી ઉપરાંત જરૂરી વિસ્તારોમાં ફોગિંગ પણ કરવામાં આવી રહ્યું છે. ડેન્ગ્યુના ફેલાવાને અટકાવવા લોકોને પણ આસપાસ સ્વચ્છતા જાળવવા અને પાણી ભરાઈ ન રહે તેની કાળજી રાખવા અપીલ કરાઈ છે.
પાણી ભરાવાના સ્થળોની નિયમિત સફાઈ જરૂરી
ડેન્ગ્યુ ફેલાવતો એડીસ ઇજિપ્તી મચ્છર ચોખ્ખા અને સ્થિર પાણીમાં ઈંડા મૂકે છે. તેથી કુલર, ફ્રિજની ટ્રે, ફૂલદાની, જૂના ટાયર અને ખુલ્લા વાસણોમાં પાણી ભરાઈ ન રહે તેની ખાસ કાળજી લેવી જરૂરી છે. આવા પાત્રોને અઠવાડિયામાં ઓછામાં ઓછા એક વખત ખાલી કરીને સાફ કરી સૂકવવાની સલાહ આપવામાં આવી છે. પાણીની ટાંકી અને અન્ય પાત્રોને પણ હવાચુસ્ત રીતે ઢાંકીને રાખવા જણાવાયું છે.
ડેન્ગ્યુનો મચ્છર મુખ્યત્વે દિવસ દરમિયાન કરડતો હોવાથી શરીર ઢંકાય તેવા કપડાં પહેરવા, મચ્છર ભગાડતી ક્રીમ અને મચ્છરદાનીનો ઉપયોગ કરવાની પણ સલાહ આપવામાં આવી છે.
તાવ સાથે આ લક્ષણો દેખાય તો તબીબી સલાહ લો
અચાનક સખત તાવ, આંખોના પાછળના ભાગમાં દુખાવો, સ્નાયુ અને સાંધામાં દુખાવો તેમજ શરીર પર લાલ ચાંઠા જેવા લક્ષણો જોવા મળે તો ડેન્ગ્યુની શક્યતા હોઈ શકે છે. આવા લક્ષણો જણાય તો વિલંબ કર્યા વિના તબીબી સલાહ મેળવી જરૂરી સારવાર કરાવવી જોઈએ.
