અમદાવાદના શાહઆલમ વિસ્તારમાં રહેતા 50 વર્ષીય બિલ્ડર આરીફ કુરેશીએ જમીનના પાવર ઓફ એટર્ની માટે ₹2 કરોડની વધારાની માગણી અને વ્યાજખોરોના કથિત ત્રાસથી કંટાળીને આત્મહત્યા કરી લીધી હોવાનો મામલો સામે આવ્યો છે. મૃતકના પુત્ર અબ્દુલહમીદ કુરેશીની ફરિયાદના આધારે દાણીલીમડા પોલીસે જમીન માલિક દિલાવરખાન પઠાણ સહિત ચાર શખ્સો સામે આત્મહત્યાની દુષ્પ્રેરણા અને નાણાં ધીરધાર અધિનિયમ હેઠળ ગુનો નોંધી તપાસ શરૂ કરી છે.
ફરિયાદ મુજબ, આરીફ કુરેશીએ સપ્ટેમ્બર 2022માં દિલાવરખાન પાસેથી દાણીલીમડાના સિકંદર માર્કેટ નજીક આવેલી 275 વાર જમીન ₹1.64 કરોડથી વધુની રકમ ચૂકવીને ખરીદી હતી. ત્યારબાદ અન્ય જમીનોનો પણ વ્યવહાર થયો હતો. દિલાવરખાને આશરે 1,500 વાર જમીનના પાવર ઓફ એટર્ની કરી આપ્યા હતા, પરંતુ બાકીની આશરે 700 વાર જમીનના નાણાં ચૂકવાઈ ગયા હોવા છતાં જરૂરી લખાણ કે પાવર કરી આપ્યો ન હોવાનો આક્ષેપ છે. જમીનના ભાવ વધતાં બાકીની જમીનનો પાવર આપવા માટે વધુ ₹2 કરોડની માગણી કરવામાં આવી હતી. રકમ નહીં ચૂકવાય તો ફ્લેટ તોડી પાડવાની ધમકી આપવા ઉપરાંત મારઝૂડ અને અપમાનિત કરવામાં આવતા હોવાનો પણ ફરિયાદમાં ઉલ્લેખ છે.
ફરિયાદ અનુસાર, નાણાંની વ્યવસ્થા કરવા માટે આરીફ કુરેશીએ પરિચિત ફિરોજખાન મારફતે તેમના પુત્ર પરવેજખાન પાસેથી 30 ટકા વ્યાજે ₹20 લાખ લીધા હતા. વર્ષ 2025 સુધીમાં વ્યાજ સહિત રકમ ચૂકવી દીધી હોવા છતાં વધુ નાણાંની ઉઘરાણી કરવામાં આવતી હોવાનો આક્ષેપ છે. આ ઉપરાંત પરવેજખાને હકીમખાન પાસેથી રોજનું ₹15 હજાર વ્યાજ ચૂકવવાની શરતે ₹15 લાખ અપાવ્યા હોવાનું પણ ફરિયાદમાં જણાવાયું છે.
ફરિયાદમાં વધુમાં આક્ષેપ કરાયો છે કે 23 સપ્ટેમ્બર 2026ના રોજ પરવેજખાને આરીફ અને તેમના પુત્રને રસ્તામાં રોકીને જાનથી મારી નાખવાની ધમકી આપી હતી. બે મહિના અગાઉ પરવેજખાન અને હકીમખાને ઘરે જઈ પરિવારની મહિલા સભ્યોને ધમકાવી ઘરમાં પૂરી બહારથી તાળું મારી દીધું હોવાનો પણ ઉલ્લેખ છે.
આ તમામ ઘટનાઓથી કંટાળીને આરીફ કુરેશીએ 10 ઑક્ટોબર 2026ના રોજ પોતાના ઘરે ગળેફાંસો ખાઈ આત્મહત્યા કરી લીધી હોવાનું ફરિયાદમાં જણાવાયું છે. પોલીસે ચારેય આરોપીઓ સામે ગુનો નોંધી સમગ્ર મામલે વધુ તપાસ હાથ ધરી છે. આરોપો અંગેની અંતિમ હકીકત પોલીસ તપાસ બાદ સ્પષ્ટ થશે.
