અમરેલી, ભાવનગર સહિત નવસારી અને વલસાડમાં ગાજવીજ સાથે હળવા વરસાદની આગાહી
ગુજરાતમાં એક તરફ ગરમીનો પારો ઊંચો રહે છે, તો બીજી તરફ લઘુત્તમ અને મહત્તમ તાપમાન વચ્ચે 13થી 14 ડિગ્રીનો તફાવત નોંધાઈ રહ્યો છે. આ મિશ્ર વાતાવરણ વચ્ચે નવરાત્રિના નવમા નોરતે સૌરાષ્ટ્ર અને દક્ષિણ ગુજરાતના કેટલાક વિસ્તારોમાં હળવા વરસાદની શક્યતા હવામાન વિભાગે વ્યક્ત કરી છે.
હવામાન વિભાગની આગાહી મુજબ, સપ્તાહના અંતે એટલે કે 19 ઓક્ટોબરની આસપાસ અમરેલી, ભાવનગર, નવસારી અને વલસાડ જિલ્લામાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડી શકે છે. દમણ અને દાદરા-નગર હવેલી વિસ્તારમાં પણ વરસાદની સંભાવના છે.
બીજી તરફ, ભુજ, ડીસા અને સુરેન્દ્રનગરમાં મહત્તમ તાપમાન 40 ડિગ્રી નોંધાયું છે. રાજ્યના મોટાભાગના વિસ્તારોમાં હવામાન સૂકું રહેવાની શક્યતા છે, જ્યારે તાપમાનમાં વધઘટને કારણે મિશ્ર વાતાવરણનો અનુભવ થઈ શકે છે. ચાર જિલ્લાઓના કેટલાક વિસ્તારોને બાદ કરતાં નવરાત્રિના ઉત્સવ દરમિયાન વરસાદની શક્યતા ઓછી હોવાનું અનુમાન છે.
