વર્ગખંડમાં ભણાવવાને બદલે ભોજન વિતરણ કેન્દ્રોના નોડલ ઓફિસર તરીકે જવાબદારી સોંપાતાં શિક્ષણ જગતમાં નારાજગી
રાજ્યમાં પ્રાથમિક શિક્ષકો પર બિનશૈક્ષણિક કામગીરીનો બોજ વધતો હોવાનો મુદ્દો ફરી ચર્ચામાં આવ્યો છે. શ્રમિક અન્નપૂર્ણા યોજના હેઠળનાં ભોજન વિતરણ કેન્દ્રોના સંચાલન અને દેખરેખ માટે પ્રાથમિક શિક્ષકોને નોડલ ઓફિસર તરીકે જવાબદારી સોંપવામાં આવતાં શિક્ષણ જગતમાં નારાજગી જોવા મળી રહી છે. શિક્ષકોને ભણતરની કામગીરી ઉપરાંત અન્ય સરકારી જવાબદારીઓ પણ સોંપાતી હોવાને કારણે વિદ્યાર્થીઓના અભ્યાસ પર અસર થવાની ચિંતા વ્યક્ત કરવામાં આવી રહી છે.
રાજ્ય શ્રમયોગી કલ્યાણ બોર્ડ દ્વારા ચલાવવામાં આવતી શ્રમિક અન્નપૂર્ણા યોજના હેઠળ બાંધકામ શ્રમિકોને નજીવા દરે ભોજન પૂરું પાડવામાં આવે છે. હવે આ યોજનાનાં ભોજન કેન્દ્રોની દેખરેખની જવાબદારી પણ શિક્ષકોને સોંપવામાં આવતાં તેમની કામગીરીમાં વધુ વધારો થવાની શક્યતા છે. કેન્દ્રો પર ભોજન વિતરણની વ્યવસ્થા અને તેની દેખરેખ રાખવા જેવી કામગીરી શિક્ષકોએ સંભાળવાની રહેશે.
શિક્ષકો પહેલેથી જ ઓનલાઈન પોર્ટલ પર માહિતી ભરવા, ડેટા એન્ટ્રી, વિવિધ સરકારી સર્વે અને વહીવટી કામગીરીમાં સમય ફાળવતા હોવાની ફરિયાદો ઉઠતી રહી છે. આવી સ્થિતિમાં નવી જવાબદારી સોંપાતાં વર્ગખંડમાં શિક્ષણકાર્ય માટે પૂરતો સમય મળશે કે નહીં તેવો પ્રશ્ન ઊભો થયો છે. ખાસ કરીને શિક્ષકોની અછત ધરાવતી શાળાઓમાં વધારાની જવાબદારીઓની અસર વધુ જોવા મળી શકે છે.
સરકારી પ્રાથમિક શાળાઓમાં અભ્યાસ કરતા વિદ્યાર્થીઓને ગુણવત્તાસભર શિક્ષણ મળે તે માટે શિક્ષકોની ઉપલબ્ધતા અને તેમનો વર્ગખંડમાં મહત્તમ સમય જરૂરી છે. શિક્ષકોને સતત બિનશૈક્ષણિક કામગીરી સોંપવામાં આવે તો વિદ્યાર્થીઓના અભ્યાસ અને શૈક્ષણિક પરિણામો પર તેની અસર થવાની ચિંતા વ્યક્ત થઈ રહી છે. આથી શિક્ષકોને સોંપવામાં આવતી વધારાની જવાબદારીઓ અને શિક્ષણકાર્ય વચ્ચે યોગ્ય સંતુલન જાળવવાની જરૂરિયાત ફરી ચર્ચામાં આવી છે.
