મુંબઈ-અમદાવાદ વચ્ચે 508 કિમીનો હાઈસ્પીડ કોરિડોર; મહત્તમ 320 કિમી પ્રતિ કલાકની ઝડપે દોડશે ટ્રેન, 2027ના અંતિમ ત્રિમાસિક ગાળામાં પ્રથમ સેવા શરૂ કરવાનું લક્ષ્ય
ભારતની પ્રથમ બુલેટ ટ્રેન યોજના હવે નિર્માણના મહત્ત્વના તબક્કામાં પહોંચી રહી છે. મુંબઈ-અમદાવાદ વચ્ચેના 508 કિલોમીટર લાંબા હાઈસ્પીડ રેલ કોરિડોર પર ટ્રેક, પુલ, ટનલ અને સ્ટેશનોનું કામ ચાલી રહ્યું છે. રેલવે મંત્રી અશ્વિની વૈષ્ણવે પ્રોજેક્ટ અંગેની માહિતી શેર કરતાં જણાવ્યું હતું કે આ પ્રોજેક્ટ દેશના રેલવે ક્ષેત્રમાં મહત્ત્વપૂર્ણ પરિવર્તન લાવશે. અહેવાલ મુજબ, પ્રથમ સેવા 2027ના અંતિમ ત્રિમાસિક ગાળામાં શરૂ કરવાનું લક્ષ્ય રાખવામાં આવ્યું છે.
મુંબઈના BKCમાં જમીનથી 32 મીટર નીચે સ્ટેશન
મુંબઈના બાન્દ્રા-કુર્લા કોમ્પ્લેક્સ (BKC)માં બુલેટ ટ્રેનનું ભૂગર્ભ સ્ટેશન બનાવવામાં આવી રહ્યું છે. આ સ્ટેશન જમીનથી આશરે 32 મીટર એટલે કે લગભગ 100 ફૂટ ઊંડે હશે. અહીં પ્લેટફોર્મ, કોન્કોર્સ અને અન્ય સુવિધાઓ માટે અલગ-અલગ સ્તર તૈયાર કરવામાં આવી રહ્યાં છે. આ સ્ટેશન હાઈસ્પીડ કોરિડોરના મહત્ત્વના ભાગોમાંનું એક છે.
થાણે ક્રીકની નીચે 7 કિમી લાંબી ટનલ
બુલેટ ટ્રેન પ્રોજેક્ટની સૌથી નોંધપાત્ર વિશેષતાઓમાંની એક થાણે ક્રીકની નીચે બનતી અંડર-સી ટનલ છે. મહારાષ્ટ્રમાં આશરે 21 કિલોમીટર લાંબા ટનલ વિભાગનો લગભગ 7 કિલોમીટરનો હિસ્સો સમુદ્રની નીચે પસાર થશે. આ ટનલના નિર્માણ માટે વિશાળ ટનલ બોરિંગ મશીનોનો ઉપયોગ કરવામાં આવી રહ્યો છે, જે જમીન અને ખડકોને કાપીને સુરંગ તૈયાર કરે છે.
અહેવાલમાં જણાવ્યા અનુસાર, ટનલ બોરિંગ મશીનોનું વજન 3,000 ટનથી વધુ છે અને કટરહેડનો વ્યાસ આશરે 13.6 મીટર છે. આટલી વિશાળ મશીનો દ્વારા ટનલનું કામ કરવું એ પ્રોજેક્ટની સૌથી જટિલ એન્જિનિયરિંગ કામગીરીઓમાંની એક છે.
320 કિમી પ્રતિ કલાકની મહત્તમ ઝડપ
મુંબઈ-અમદાવાદ હાઈસ્પીડ રેલ કોરિડોર પર બુલેટ ટ્રેનની મહત્તમ ઝડપ 320 કિલોમીટર પ્રતિ કલાક રાખવાનું આયોજન છે. આ પ્રોજેક્ટ મહારાષ્ટ્ર, ગુજરાત અને દાદરા-નગર હવેલીમાંથી પસાર થશે. નિર્ધારિત રૂટમાં મુંબઈ (BKC), થાણે, વિરાર, બોઇસર, વાપી, બિલીમોરા, સુરત, ભરૂચ, વડોદરા, આણંદ, અમદાવાદ અને સાબરમતી સહિતનાં સ્ટેશનોનો સમાવેશ થાય છે.
ગુજરાતને પણ મળશે હાઈસ્પીડ કનેક્ટિવિટીનો લાભ
મુંબઈ-અમદાવાદ બુલેટ ટ્રેન શરૂ થયા બાદ ગુજરાતનાં સુરત, ભરૂચ, વડોદરા, આણંદ અને અમદાવાદ જેવા શહેરોને હાઈસ્પીડ રેલવે જોડાણનો લાભ મળવાની અપેક્ષા છે. જોકે, પ્રોજેક્ટની વાસ્તવિક શરૂઆત નિર્માણની પ્રગતિ, પરીક્ષણ અને જરૂરી મંજૂરીઓ પર આધારિત રહેશે. દેશની પ્રથમ બુલેટ ટ્રેન ક્યારે દોડશે અને મુસાફરોને તેની સેવા ક્યારે ઉપલબ્ધ થશે તેના પર હવે સૌની નજર છે.
