SIR અને ‘વોટ ચોરી’ના મુદ્દે કોંગ્રેસ-વિપક્ષના પ્રચારનો જવાબ આપવા ભાજપનું શક્તિપ્રદર્શન; તરૂણ ચુગ, જગદીશ વિશ્વકર્મા અને મનસુખ માંડવિયા સહિતના નેતાઓ જોડાશે
ચૂંટણી પંચની મતદાર યાદી સુધારણા પ્રક્રિયા (SIR) અને ‘વોટ ચોરી’ના મુદ્દે કોંગ્રેસ સહિતના વિપક્ષો દ્વારા કરવામાં આવતા આક્ષેપો વચ્ચે ભાજપે ‘લોકતંત્ર બચાવો, અરાજકતા હટાવો’ અભિયાન શરૂ કર્યું છે. આ અભિયાનના ભાગરૂપે રાજકોટમાં બપોરે 4:30 વાગ્યે વિશાળ રેલી અને પદયાત્રાનું આયોજન કરવામાં આવ્યું છે. આ કાર્યક્રમમાં સૌરાષ્ટ્રભરના ભાજપના સાંસદો, ધારાસભ્યો, પદાધિકારીઓ અને મોટી સંખ્યામાં કાર્યકરો જોડાશે.
સૌરાષ્ટ્રના ભાજપના નેતાઓની ઉપસ્થિતિ
રાજકોટમાં યોજાનારી પદયાત્રામાં ગુજરાત ભાજપના પ્રભારી તરૂણ ચુગ, પ્રદેશ પ્રમુખ જગદીશ વિશ્વકર્મા, કેન્દ્રીય મંત્રી મનસુખ માંડવિયા અને પ્રદેશ સહપ્રભારી અજય મહાવર સહિતના નેતાઓ હાજર રહેવાના છે. ભાજપ દ્વારા આ કાર્યક્રમને સૌરાષ્ટ્રમાં સંગઠનની એકતા અને શક્તિ દર્શાવવાના પ્રયાસ તરીકે રજૂ કરવામાં આવી રહ્યો છે.
બહુમાળી ભવનથી શરૂ થશે પદયાત્રા
આયોજન મુજબ પદયાત્રાનો પ્રારંભ બહુમાળી ભવન પાસે આવેલી સરદાર વલ્લભભાઈ પટેલની પ્રતિમાથી થશે. ત્યાં તૈયાર કરવામાં આવેલા મંચ પરથી પ્રદેશ પ્રભારી તરૂણ ચુગ કાર્યકરોને સંબોધશે.
ત્યારબાદ પદયાત્રા ગેલેક્સી ટોકીઝ રોડ, જિલ્લા પંચાયત ચોક અને યાજ્ઞિક રોડ થઈને સ્વામી વિવેકાનંદની પ્રતિમા પાસે પહોંચશે. ત્યાંથી ત્રિકોણબાગ સુધી પદયાત્રા યોજાવાની શક્યતા છે. આયોજન મુજબ પદયાત્રા આશરે દોઢ કિલોમીટરનું અંતર કાપશે.
‘ભ્રામક માહિતીનો જવાબ આપવા પદયાત્રા’
ભાજપના પ્રદેશ મહામંત્રી અનિરુદ્ધ દવેના જણાવ્યા અનુસાર, વિપક્ષ દ્વારા SIR અને મતદાન પ્રક્રિયા અંગે ફેલાવવામાં આવતી હોવાનો ભાજપનો આક્ષેપ છે તેવી ભ્રામક માહિતીને જવાબ આપવા આ પદયાત્રાનું આયોજન કરવામાં આવ્યું છે. ભાજપનો હેતુ પોતાના પક્ષની રજૂઆત લોકો સુધી પહોંચાડવાનો અને વિપક્ષના રાજકીય એજન્ડા સામે પ્રતિક્રિયા આપવાનો છે.
સાધુ-સંતો અને વિવિધ ક્ષેત્રના અગ્રણીઓની હાજરીનો દાવો
આ કાર્યક્રમમાં સાધુ-સંતો, બૌદ્ધિકો, નાગરિકો અને વિવિધ વ્યવસાય સાથે જોડાયેલા અગ્રણીઓ પણ ઉપસ્થિત રહેવાના હોવાનો આયોજકોનો દાવો છે. રાજકોટ શહેર ભાજપ પ્રમુખ ડૉ. માધવ દવેના નેતૃત્વ હેઠળ શહેર અને સૌરાષ્ટ્રના ભાજપના આગેવાનો કાર્યક્રમની તૈયારીઓમાં સક્રિય હોવાનું જણાવાયું છે.
રાજકોટમાં યોજાનારી આ પદયાત્રા દ્વારા ભાજપ SIR અને ‘વોટ ચોરી’ના મુદ્દે વિપક્ષના આક્ષેપો સામે પોતાની રાજકીય રજૂઆત કરશે. કાર્યક્રમમાં કેટલા કાર્યકરો અને નાગરિકો જોડાય છે તેના પર સૌની નજર રહેશે.
