સીટી-એ, બી અને સી ડિવિઝન પોલીસની કાર્યવાહી; છેલ્લા ત્રણ મહિનામાં ઝડપાયેલી 17,257 બોટલોનો કાયદેસર નિકાલ
જામનગર શહેરમાં દારૂબંધીના કાયદા હેઠળ વિવિધ સ્થળોએથી પકડાયેલા વિદેશી દારૂના જથ્થાનો નાશ કરવાની કાર્યવાહી હાથ ધરવામાં આવી હતી. સીટી-એ, બી અને સી ડિવિઝન પોલીસ દ્વારા છેલ્લા ત્રણ મહિનામાં ઝડપાયેલી કુલ 17,257 દારૂની બોટલો, જેની અંદાજિત કિંમત રૂ.75.27 લાખ થાય છે, તેનો બુલડોઝર ફેરવી નાશ કરવામાં આવ્યો હતો.
આ કાર્યવાહી જામનગર શહેર વિભાગના પ્રાંત અધિકારી એસ.ડી. બારડ અને નાયબ પોલીસ અધિક્ષક જે.એન. ઝાલાની હાજરીમાં હાથ ધરવામાં આવી હતી. આ ઉપરાંત શહેરના ત્રણેય પોલીસ ડિવિઝનના પોલીસ ઇન્સ્પેક્ટરો, પ્રોહિબિશન શાખાના પોલીસ ઇન્સ્પેક્ટર સહિતના પોલીસ અધિકારીઓ અને કર્મચારીઓ પણ ઉપસ્થિત રહ્યા હતા.
પોલીસ દ્વારા છેલ્લા ત્રણ મહિનામાં અલગ-અલગ સ્થળોએથી પકડાયેલા દારૂના જથ્થાનો કાયદેસરની પ્રક્રિયા પૂર્ણ કર્યા બાદ નિકાલ કરવામાં આવ્યો હતો. મોટી સંખ્યામાં દારૂની બોટલોનો નાશ કરીને પોલીસે જપ્ત કરાયેલા મુદ્દામાલનો કાયદેસર નિકાલ કર્યો હતો.
