પાઇપલાઇન લીકેજથી શોર્ટ સર્કિટનું જોખમ; ઇન્ડિગોનો ચાર ટન માલ લોડ ન થતાં કાર્ગો સેવા પર અસર
રાજકોટના હિરાસર સ્થિત ઇન્ટરનેશનલ એરપોર્ટના કાર્ગો વિભાગમાં પાઇપલાઇન લીકેજની સમસ્યાને કારણે છેલ્લા બે દિવસથી કામગીરી ખોરવાઈ હોવાનો અહેવાલ સામે આવ્યો છે. પાઇપલાઇનમાંથી સતત પાણી વહેતાં કાર્ગો ફ્લોર પર પાણી ભરાઈ ગયું છે. પાણી ઇલેક્ટ્રિક બોર્ડ સુધી પહોંચતાં શોર્ટ સર્કિટનું જોખમ ઊભું થયું છે, જેના પગલે કર્મચારીઓની સુરક્ષાને ધ્યાનમાં રાખીને કાર્ગો લોડિંગ અટકાવવું પડ્યું છે.
ઇન્ડિગોનો ચાર ટન માલ લોડ થઈ શક્યો નહીં
મળતી વિગતો મુજબ, લીકેજને કારણે ઇન્ડિગો એરલાઇન્સનો આશરે ચાર ટન માલ લોડ થઈ શક્યો નથી. આ માલની કિંમત અંદાજે રૂ.2 લાખ હોવાનું જણાવાયું છે. કાર્ગો વિભાગમાં પાણી ભરાવાથી કામગીરીમાં વિક્ષેપ પડ્યો છે અને માલસામાનના પરિવહન પર અસર થઈ છે.
એરપોર્ટ ઓથોરિટી સમક્ષ રજૂઆત
કાર્ગો વિભાગમાં સર્જાયેલી સમસ્યાનો કાયમી ઉકેલ લાવવા અને સુરક્ષિત વાતાવરણમાં કામગીરી ફરી શરૂ કરવા માટે એરપોર્ટ ઓથોરિટી સમક્ષ રજૂઆત કરવામાં આવી છે. જોકે, લીકેજની સમસ્યા યથાવત્ રહેતાં કામગીરી ક્યારે પૂર્વવત્ થશે તે અંગે અનિશ્ચિતતા છે.
કરોડોના ખર્ચે બનેલા એરપોર્ટમાં જાળવણી સામે સવાલો
હિરાસર ઇન્ટરનેશનલ એરપોર્ટનું નિર્માણ આશરે રૂ.2,654 કરોડના ખર્ચે કરવામાં આવ્યું છે. આટલા મોટા ખર્ચે તૈયાર થયેલા એરપોર્ટના કાર્ગો વિભાગમાં પાઇપલાઇન લીકેજને કારણે કામગીરી અટકવાની સ્થિતિ સર્જાતાં સુવિધાઓની જાળવણી અંગે સવાલો ઊભા થયા છે. હવે લીકેજનું સમારકામ કરીને કાર્ગો કામગીરી ક્યારે શરૂ કરવામાં આવે છે તેના પર સૌની નજર છે.
