નર્મદા જળસંકટ મુદ્દે આંતરરાજ્ય બેઠકમાં ભાગ લેવા દિલ્હી પહોંચ્યા મુખ્યમંત્રી; જે.પી. નડ્ડાના નેતૃત્વમાં યોજાનારી પદયાત્રામાં મુખ્યમંત્રીની ગેરહાજરી
ગુજરાતમાં ઓછા અને અનિયમિત વરસાદને કારણે ઊભી થયેલી જળસંકટની સ્થિતિ વચ્ચે મુખ્યમંત્રી ભૂપેન્દ્ર પટેલ નર્મદા બંધ સાથે સંકળાયેલા રાજ્યોની બેઠકમાં ભાગ લેવા આજે સવારે દિલ્હી પહોંચ્યા હતા. તેઓ મોડી સાંજે ગુજરાત પરત ફરે તેવી શક્યતા છે.
બીજી તરફ, અમદાવાદમાં આજે બપોરે 4:30 વાગ્યે ‘લોકતંત્ર બચાવો, અરાજકતા હટાવો’ના સંદેશ સાથે પદયાત્રાનું આયોજન કરવામાં આવ્યું છે. કેન્દ્રીય મંત્રી જે.પી. નડ્ડાના નેતૃત્વમાં યોજાનારી આ પદયાત્રામાં મુખ્યમંત્રી ભૂપેન્દ્ર પટેલ હાજર રહી શકશે નહીં.
મુખ્યમંત્રીના સ્થાને હર્ષ સંઘવી જોડાશે
ભાજપનાં સૂત્રોના જણાવ્યા અનુસાર, મુખ્યમંત્રીના દિલ્હી પ્રવાસને કારણે અમદાવાદની પદયાત્રામાં તેમના સ્થાને નાયબ મુખ્યમંત્રી હર્ષ સંઘવી જોડાશે. મુખ્યમંત્રી અગાઉ રાજકોટમાં યોજાનારી પદયાત્રામાં પણ ભાગ લેવાના હતા, પરંતુ દિલ્હીનો કાર્યક્રમ નિશ્ચિત થતાં તેઓ રાજકોટ અને અમદાવાદ બંને સ્થળે હાજર રહી શકશે નહીં.
ભાજપનાં સૂત્રોના જણાવ્યા મુજબ, મુખ્યમંત્રી ભૂપેન્દ્ર પટેલ આવતીકાલે વડોદરામાં યોજાનારી પદયાત્રામાં સામેલ થઈ શકે છે. જોકે, તેમના કાર્યક્રમ અંગેની અંતિમ પુષ્ટિ સત્તાવાર જાહેરાત બાદ જ થઈ શકશે.
