સ્ટેચ્યુ ઓફ યુનિટી નજીક રોશનીથી ઝળહળતી કલાકૃતિઓ નિહાળી; ભારતની વિવિધ સંસ્કૃતિઓ અને પરંપરાઓની રજૂઆતથી થયા પ્રભાવિત
રાજપીપળા (નર્મદા): સરદાર વલ્લભભાઈ પટેલની 151મી જન્મજયંતિ અને રાષ્ટ્રીય એકતા દિવસની પૂર્વસંધ્યાએ વડાપ્રધાન નરેન્દ્ર મોદીએ એકતાનગર ખાતે આયોજિત ‘એકતા પ્રકાશ પર્વ-2026’ની મુલાકાત લીધી હતી. આ દરમિયાન તેમણે પ્રકાશોત્સવના ઇન્ડોર અને આઉટડોર વિભાગોમાં રજૂ કરવામાં આવેલી વિવિધ કલાત્મક રચનાઓ, શિલ્પો અને રંગબેરંગી રોશનીના શણગારનું નિરીક્ષણ કર્યું હતું.
ચાર પ્રાદેશિક ઝોનમાં ભારતની સંસ્કૃતિની ઝાંખી
પ્રકાશોત્સવના ઇન્ડોર વિભાગમાં ઉત્તર, પૂર્વ, પશ્ચિમ અને દક્ષિણ ભારત એમ ચાર પ્રાદેશિક ઝોન તૈયાર કરવામાં આવ્યા છે. દરેક ઝોનમાં તે વિસ્તારની ઐતિહાસિક વિરાસત, લોકકલા, સ્થાપત્ય અને સાંસ્કૃતિક પરંપરાઓને રોશની તથા કલાત્મક રચનાઓના માધ્યમથી રજૂ કરવામાં આવી છે.
ઉત્તર ભારતના વિભાગમાં રામમંદિર, હિમાલયની સંસ્કૃતિ તેમજ પંજાબ અને રાજસ્થાનની લોકકલાની ઝાંખી જોવા મળે છે. પૂર્વ ભારતના વિભાગમાં આસામનો બિહુ ઉત્સવ, ઓડિશાનું પરંપરાગત સ્થાપત્ય અને બંગાળની સાંસ્કૃતિક પરંપરાઓને સ્થાન આપવામાં આવ્યું છે.
આઉટડોર વિભાગના 11 ભાગોમાં પ્રકાશિત કલાકૃતિઓનું આકર્ષણ
સ્ટેચ્યુ ઓફ યુનિટી નજીકના આઉટડોર વિભાગમાં 11 અલગ-અલગ વિભાગો દ્વારા ભારતીય જીવનમૂલ્યો, સંસ્કૃતિ અને પરંપરાઓને આકર્ષક રીતે રજૂ કરવામાં આવી છે. વડાપ્રધાને અહીં ‘ભારત-સોને કી ચીડિયા’, ‘સમય કા ચક્ર’, યોગ, દીપ સુરંગ, પ્રકાશિત પુષ્પો, રંગબેરંગી બલૂન અને વિવિધ પ્રકાશિત શિલ્પો નિહાળ્યાં હતાં.
રોશની અને કલાત્મક રચનાઓના સમન્વયથી તૈયાર કરવામાં આવેલા આ વિભાગોમાં ભારતની વિવિધતામાં એકતાની ભાવનાને ઉજાગર કરવાનો પ્રયાસ કરવામાં આવ્યો છે.
સતત બીજા વર્ષે યોજાયો પ્રકાશોત્સવ
વર્ષ 2025માં પ્રથમ વખત યોજાયેલા પ્રકાશોત્સવને મળેલા પ્રતિસાદ બાદ મુખ્યમંત્રી ભૂપેન્દ્ર પટેલના માર્ગદર્શન હેઠળ સતત બીજા વર્ષે ‘એકતા પ્રકાશ પર્વ’નું આયોજન કરવામાં આવ્યું છે. 91 દિવસ સુધી ચાલનારા આ ઉત્સવમાં પ્રવાસીઓ અને મુલાકાતીઓને ભારતની વિવિધ સાંસ્કૃતિક પરંપરાઓને પ્રકાશિત કલાકૃતિઓના માધ્યમથી નિહાળવાની તક મળશે.
આયોજકો દ્વારા આપવામાં આવેલી માહિતી અનુસાર, મુલાકાતીઓ 15 જાન્યુઆરી, 2027 સુધી દરરોજ સાંજે 6થી રાત્રે 10:30 વાગ્યા સુધી નિઃશુલ્ક પ્રવેશ મેળવી શકશે. એકતાનગરમાં યોજાયેલો આ પ્રકાશોત્સવ પ્રવાસીઓ માટે આકર્ષણનું કેન્દ્ર બનવાની સાથે રાષ્ટ્રીય એકતા અને સાંસ્કૃતિક વારસાની ઉજવણીનું માધ્યમ બન્યો છે.
