અમદાવાદમાં સેમિફાઇનલમાં ભારતનો દમદાર વિજય; મહિલા ટીમ બાદ પુરુષ ટીમે પણ ફાઇનલમાં સ્થાન મેળવ્યું
અમદાવાદ: અમદાવાદમાં યોજાઈ રહેલી કોમનવેલ્થ કબડ્ડી ચેમ્પિયનશિપ-2026માં ભારતીય પુરુષ કબડ્ડી ટીમે શાનદાર પ્રદર્શન કરીને ફાઇનલમાં પ્રવેશ મેળવ્યો છે. નારણપુરા સ્થિત વીર સાવરકર સ્પોર્ટ્સ કોમ્પ્લેક્સ ખાતે રમાયેલી સેમિફાઇનલમાં ભારતે બાંગ્લાદેશને 56-27ના વિશાળ અંતરથી હરાવી ફાઇનલમાં પોતાનું સ્થાન નિશ્ચિત કર્યું હતું.
ભારતીય ખેલાડીઓના પ્રદર્શનથી દર્શકોમાં ઉત્સાહ
ભારત અને બાંગ્લાદેશ વચ્ચેની સેમિફાઇનલ મેચ નિહાળવા રાજ્યના નાયબ મુખ્યમંત્રી હર્ષ સંઘવી ખાસ ઉપસ્થિત રહ્યા હતા. તેમણે સ્ટેડિયમમાં હાજર રહી ભારતીય ખેલાડીઓનો ઉત્સાહ વધાર્યો હતો અને ટીમના શાનદાર પ્રદર્શનને બિરદાવ્યું હતું. ભારતે શરૂઆતથી જ રમત પર પકડ જાળવી રાખી હતી અને અંતે 56-27ના સ્કોર સાથે જીત મેળવી હતી.
બાંગ્લાદેશની ટીમનું પણ સન્માન
મેચ પૂર્ણ થયા બાદ ટૂર્નામેન્ટમાં પોતાની સફર પૂર્ણ કરનારી બાંગ્લાદેશની ટીમના ખેલાડીઓ અને કોચિંગ સ્ટાફનું સન્માન કરવામાં આવ્યું હતું. નાયબ મુખ્યમંત્રી હર્ષ સંઘવીના હસ્તે બાંગ્લાદેશની ટીમને મેડલ અને ટ્રોફી એનાયત કરવામાં આવ્યાં હતાં.
મહિલા ટીમ બાદ પુરુષ ટીમ પણ ફાઇનલમાં
આ ચેમ્પિયનશિપમાં ભારતીય મહિલા કબડ્ડી ટીમ અગાઉ જ ફાઇનલમાં પ્રવેશ મેળવી ચૂકી છે. હવે પુરુષ ટીમે પણ બાંગ્લાદેશને હરાવી ફાઇનલમાં સ્થાન મેળવતાં ભારતની બંને ટીમો ટાઇટલ જીતવાની દિશામાં આગળ વધી છે. અમદાવાદમાં યોજાતી આ આંતરરાષ્ટ્રીય સ્પર્ધામાં ભારતીય પુરુષ અને મહિલા ટીમોના પ્રદર્શનથી રમતપ્રેમીઓમાં ઉત્સાહનો માહોલ જોવા મળી રહ્યો છે.
