₹27,500 કરોડના મેગા શિપ બિલ્ડિંગ યાર્ડ બદલ વ્યક્ત કર્યો આભાર; રેલવે અને ઈન્ફ્રાસ્ટ્રક્ચર પ્રોજેક્ટ્સ અંગે પણ મહત્વપૂર્ણ રજૂઆત
નવી દિલ્હી: ગુજરાત સરકારના કેબિનેટ મંત્રી અર્જુન મોઢવાડિયાએ વડાપ્રધાન નરેન્દ્ર મોદી સાથે નવી દિલ્હીમાં સૌજન્ય મુલાકાત કરી હતી. આ દરમિયાન પોરબંદરમાં ₹27,500 કરોડના રોકાણ સાથે મેગા શિપ બિલ્ડિંગ યાર્ડને મંજૂરી આપવા બદલ તેમણે વડાપ્રધાનને પાઘડી અને શાલ અર્પણ કરી આભાર વ્યક્ત કર્યો હતો.
મુલાકાત દરમિયાન અર્જુન મોઢવાડિયાએ મુખ્યમંત્રી ભૂપેન્દ્ર પટેલના નેતૃત્વમાં પોરબંદર જિલ્લામાં ચાલી રહેલા વિકાસકાર્યોની માહિતી આપી હતી તેમજ જિલ્લાના ભાવિ વિકાસ માટે વડાપ્રધાનનું માર્ગદર્શન મેળવ્યું હતું.
આ ઉપરાંત કેન્દ્રીય મંત્રી મનસુખ માંડવિયા સાથે મળીને તેમણે કેન્દ્રીય રેલવે મંત્રી અશ્વિની વૈષ્ણવ સાથે બેઠક યોજી હતી. બેઠકમાં પોરબંદર અને સમગ્ર સૌરાષ્ટ્રના રેલવે વિકાસને વેગ આપવા માટે અનેક મહત્વપૂર્ણ માંગણીઓ રજૂ કરવામાં આવી હતી.
રજૂઆતમાં પોરબંદર ખાતે વિશ્વસ્તરીય આઇકોનિક રેલવે સ્ટેશન, મુખ્ય માર્ગ સાથે સુગમ કનેક્ટિવિટી, જમીન સંપાદન પ્રક્રિયાને ઝડપી બનાવવી, નવા ROB અને RUBના નિર્માણ તેમજ સમગ્ર સૌરાષ્ટ્રમાં આધુનિક રેલવે સુવિધાઓના વિકાસ જેવા મુદ્દાઓનો સમાવેશ કરવામાં આવ્યો હતો.
મોઢવાડિયાના જણાવ્યા મુજબ કેન્દ્રીય મંત્રી અશ્વિની વૈષ્ણવે તમામ રજૂઆતોને સકારાત્મક પ્રતિસાદ આપતાં જરૂરી કાર્યવાહી અને સમયબદ્ધ અમલીકરણની ખાતરી આપી છે. તેમણે પોરબંદર જિલ્લાના વિકાસ માટે કેન્દ્ર સરકારના સહયોગ બદલ વડાપ્રધાન અને કેન્દ્રીય મંત્રીનો આભાર વ્યક્ત કર્યો છે.
