અમદાવાદ DEOનો મહત્વપૂર્ણ નિર્ણય; અભ્યાસક્રમ સમયસર પૂર્ણ કરવા શાળાઓને રવિવારે વર્ગો ચલાવવાની મંજૂરી
અમદાવાદ: શહેરમાં તાજેતરમાં ભારે વરસાદને કારણે શાળાઓમાં જાહેર કરાયેલી વારંવારની રજાઓ બાદ વિદ્યાર્થીઓના અભ્યાસને થયેલા નુકસાનની ભરપાઈ કરવા જિલ્લા શિક્ષણ અધિકારી (DEO)એ મહત્વપૂર્ણ નિર્ણય લીધો છે. હવે અમદાવાદની શાળાઓ જરૂરિયાત મુજબ રવિવારે પણ વર્ગો ચલાવી શકશે.
આ અંગેનો પરિપત્ર અમદાવાદ પૂર્વ અને પશ્ચિમ ઝોનની તમામ સરકારી, અનુદાનિત (ગ્રાન્ટ-ઇન-એઇડ) તેમજ વિવિધ બોર્ડ સાથે સંકળાયેલી ખાનગી શાળાઓને મોકલવામાં આવ્યો છે. અભ્યાસક્રમ સમયસર પૂર્ણ થાય અને વિદ્યાર્થીઓનું શૈક્ષણિક નુકસાન ઓછું થાય તે હેતુથી આ નિર્ણય લેવામાં આવ્યો છે.
જિલ્લા શિક્ષણ અધિકારીએ સ્પષ્ટ કર્યું છે કે રવિવારે શાળા શરૂ કરવાનો નિર્ણય સંપૂર્ણપણે શાળા સંચાલકોની મરજી પર આધારિત રહેશે. જો શાળા સંચાલન યોગ્ય માને તો ચાલુ મહિના દરમિયાન રવિવારે વર્ગો યોજી શકશે. જોકે, તેના માટે વિદ્યાર્થીઓ અને વાલીઓને અગાઉથી જાણ કરવી ફરજિયાત રહેશે.
રવિવારના વર્ગોમાં રિવિઝન સેશન, ડાઉટ સોલ્વિંગ, મૂલ્યાંકન તથા અન્ય શૈક્ષણિક પ્રવૃત્તિઓ યોજી શકાશે. સાથે જ શિક્ષકોની હાજરી સુનિશ્ચિત કરવા પણ સૂચના આપવામાં આવી છે.
પરિપત્રમાં વિદ્યાર્થીઓની સુરક્ષાને સર્વોચ્ચ પ્રાથમિકતા આપતાં જણાવાયું છે કે શાળાઓએ સ્થાનિક હવામાનની સ્થિતિ અને પોતાની ઈન્ફ્રાસ્ટ્રક્ચર સુવિધાઓને ધ્યાનમાં રાખીને જ રવિવારે વર્ગો યોજવાનો અંતિમ નિર્ણય લેવો રહેશે.
