700 અરજદારોની જગ્યાઓ અનામત રાખી બાકીની ભરતી આગળ વધારવાની મંજૂરી
અમદાવાદ: ગુજરાતની સરકારી પ્રાથમિક શાળાઓમાં વિદ્યાસહાયકોની ભરતીને લઈને ચાલી રહેલા કાનૂની વિવાદ વચ્ચે ગુજરાત હાઇકોર્ટે મહત્વનો વચગાળાનો આદેશ આપ્યો છે. આ આદેશથી આશરે 11 હજાર વિદ્યાસહાયકોની ભરતી પ્રક્રિયા આગળ વધવાનો માર્ગ મોકળો થયો છે.
ટેટ-1ના આધારે હાથ ધરાયેલી ભરતીમાં કેટલાક ઉમેદવારોને ગેરલાયક ઠેરવાતા અને ભરતીના નિયમો સામે વાંધા ઉઠાવતા અનેક ઉમેદવારોએ હાઇકોર્ટમાં અરજીઓ કરી હતી. જેના કારણે ભરતી પ્રક્રિયા અટકી હતી.
રાજ્ય સરકારે કોર્ટ સમક્ષ રજૂઆત કરી હતી કે કુલ 11 હજાર જગ્યાઓમાંથી હાઇકોર્ટમાં અરજી કરનારા આશરે 700 ઉમેદવારોની જગ્યાઓ હાલ પૂરતી અનામત રાખવામાં આવે, જ્યારે બાકીની જગ્યાઓ પર ભરતી પ્રક્રિયા આગળ વધારવાની મંજૂરી આપવામાં આવે.
કોર્ટે સરકારની આ વચગાળાની દરખાસ્તને મંજૂરી આપી છે. સરકાર તરફથી અરજદારોના હિતોનું પણ ધ્યાન રાખવામાં આવશે તેવી ખાતરી આપવામાં આવી છે.
આ ઉપરાંત શિક્ષણ વિભાગ દ્વારા 2027માં વધુ 5 હજાર જેટલી વિદ્યાસહાયકોની જગ્યાઓ પર ભરતી કરવાની યોજના હોવાનું પણ કોર્ટ સમક્ષ જણાવાયું હતું.
હાઇકોર્ટના આદેશથી ભરતીની રાહ જોઈ રહેલા હજારો ઉમેદવારોને મોટી રાહત મળી છે.
