રાજકોટ: રાજકોટ સિવિલ હોસ્પિટલમાં તબીબોની કામગીરી અને શિસ્તને લઈને વધુ એક વિવાદ સામે આવ્યો છે. સિનિયર મેડિકલ ઓફિસર ડો. અશ્વિન રામાણી દ્વારા મહિલા તબીબ સાથે મારપીટ કરવામાં આવી હોવાના આક્ષેપ સાથેનો વીડિયો સોશિયલ મીડિયામાં વાયરલ થતાં હોસ્પિટલ તંત્રમાં ચકચાર મચી છે.
વાયરલ થયેલા વીડિયોમાં મહિલા તબીબ અને ડો. અશ્વિન રામાણી હોવાનું જણાવવામાં આવતી વ્યક્તિ વચ્ચે ઉગ્ર બોલાચાલી અને ખેંચતાણ જેવી સ્થિતિ જોવા મળી રહી છે. આ દરમિયાન મહિલા તબીબને ફડાકો મારવામાં આવ્યો હોવાનો આક્ષેપ પણ કરવામાં આવી રહ્યો છે.
ઘટનાનો વીડિયો વાયરલ થતાં સિવિલ હોસ્પિટલના તબીબી વર્તુળોમાં પણ ચર્ચા શરૂ થઈ છે. ફરજ દરમિયાન જ તબીબો વચ્ચે આવી સ્થિતિ સર્જાઈ હોય તો હોસ્પિટલની શિસ્ત તેમજ તબીબોના કાર્યસ્થળે સુરક્ષાને લઈને ગંભીર સવાલો ઉભા થાય છે.
જોકે, વાયરલ વીડિયોની સંપૂર્ણ હકીકત અને ઘટનાનો ચોક્કસ સંદર્ભ સત્તાવાર રીતે સ્પષ્ટ થયો નથી. વિવાદનું મૂળ કારણ શું હતું અને મહિલા તબીબ સાથે ખરેખર મારપીટ થઈ હતી કે કેમ તે તપાસ બાદ જ સ્પષ્ટ થશે.
હવે હોસ્પિટલ પ્રશાસન દ્વારા વાયરલ વીડિયોની હકીકત ચકાસી સમગ્ર મામલે નિષ્પક્ષ તપાસ કરી સત્તાવાર સ્પષ્ટતા કરવામાં આવે છે કે નહીં, તેના પર સૌની નજર છે.
