12 મીટર પહોળો ફૂટ ઓવરબ્રિજ, લિફ્ટ-એસ્કેલેટર, ફૂડ પ્લાઝા અને એસી વેઇટિંગ રૂમ સહિતની સુવિધાઓ મળશે; બુલેટ ટ્રેનના મલ્ટી મોડલ હબ સાથે પણ જોડાણ
અમદાવાદના સાબરમતી રેલવે સ્ટેશનને આધુનિક સુવિધાઓથી સજ્જ કરવા માટે અમૃત ભારત સ્ટેશન યોજના હેઠળ ચાલી રહેલા રિડેવલપમેન્ટ પ્રોજેક્ટની કામગીરી ઝડપથી આગળ વધી રહી છે. આ પ્રોજેક્ટનું 85 ટકાથી વધુ કામ પૂર્ણ થઈ ગયું છે. રેલવે અધિકારીઓના જણાવ્યા અનુસાર, માર્ચ 2027 સુધીમાં સ્ટેશનના રિડેવલપમેન્ટની સમગ્ર કામગીરી પૂર્ણ કરવાનું આયોજન છે. કામ પૂર્ણ થયા બાદ મુસાફરોને વધુ સુવિધાજનક અને આધુનિક રેલવે સ્ટેશનનો અનુભવ મળશે.
પ્લેટફોર્મ પર કામગીરી અંતિમ તબક્કામાં
સાબરમતી રેલવે સ્ટેશનના વિવિધ પ્લેટફોર્મ પર તબક્કાવાર કામગીરી હાથ ધરવામાં આવી રહી છે. હાલમાં પ્લેટફોર્મ નંબર 2 અને 3 પર બ્લોક લઈને બાંધકામની કામગીરી ચાલી રહી છે. પ્લેટફોર્મ નંબર 1 પર બીમ ભરવા અને કોન્કોર્સ એરિયાને મુખ્ય બિલ્ડિંગ સાથે જોડવા સહિતની કામગીરીનો આશરે અડધો ભાગ પૂર્ણ થઈ ગયો છે. દિવાળીના તહેવારો પૂર્ણ થયા બાદ પ્લેટફોર્મ નંબર 1 પર બ્લોક લઈને બાકી રહેલું કામ પૂર્ણ કરવાની યોજના છે. બીજી તરફ, સ્ટેશન બિલ્ડિંગ સાથે જોડાયેલા પ્લેટફોર્મ નંબર 4-5 અને 6-7ની કામગીરી અગાઉથી પૂર્ણ કરી દેવામાં આવી છે.
મુસાફરોને મળશે આધુનિક સુવિધાઓ
રિડેવલપમેન્ટ પૂર્ણ થયા બાદ સ્ટેશન પર મુસાફરોની સુવિધા અને અવરજવરને ધ્યાનમાં રાખીને અનેક આધુનિક વ્યવસ્થાઓ ઊભી કરવામાં આવશે. તમામ પ્લેટફોર્મ પર મુસાફરોને સરળતાથી અવરજવર કરી શકાય તે માટે વિશાળ કોન્કોર્સ એરિયા વિકસાવવામાં આવી રહ્યો છે. એક પ્લેટફોર્મ પરથી બીજા પ્લેટફોર્મ પર જવા માટે લિફ્ટ અને એસ્કેલેટરની સુવિધા પણ ઉપલબ્ધ કરાવવામાં આવશે.
મુસાફરોની અવરજવર વધુ ઝડપી અને સરળ બને તે માટે 12 મીટર પહોળો નવો ફૂટ ઓવરબ્રિજ બનાવવામાં આવી રહ્યો છે. આ ઉપરાંત, સ્ટેશન પર ટ્રાફિકની સમસ્યા ઓછી કરવા માટે વાહનોના પિક-અપ, ડ્રોપ અને પાર્કિંગ માટે અલગ વ્યવસ્થા તથા પ્રવેશ અને બહાર નીકળવાના અલગ ગેટ બનાવવામાં આવશે.
બુલેટ ટ્રેનના મલ્ટી મોડલ હબ સાથે જોડાણ
સાબરમતી રેલવે સ્ટેશનના રિડેવલપમેન્ટમાં કનેક્ટિવિટી પર પણ વિશેષ ધ્યાન આપવામાં આવી રહ્યું છે. સ્ટેશનને બુલેટ ટ્રેનના મલ્ટી મોડલ હબ સાથે જોડવામાં આવશે, જેથી મુસાફરોને પરિવહનનાં વિવિધ સાધનો વચ્ચે અવરજવર કરવામાં સરળતા રહેશે.
ફૂડ પ્લાઝાથી ડિજિટલ ડિસ્પ્લે સુધીની સુવિધાઓ
સ્ટેશન પર મુસાફરો માટે ફૂડ પ્લાઝા, એસી અને નોન-એસી વેઇટિંગ રૂમ તથા રિટાયરિંગ રૂમ જેવી સુવિધાઓ વિકસાવવામાં આવશે. ટ્રેનોની માહિતી સરળતાથી મળી રહે તે માટે હાઇ-ટેક ડિજિટલ ડિસ્પ્લે બોર્ડ અને આધુનિક જાહેર ઉદ્ઘોષણા સિસ્ટમ પણ સ્થાપિત કરવામાં આવશે.
સુરક્ષાને ધ્યાનમાં રાખીને સમગ્ર સ્ટેશન પર CCTV સર્વેલન્સ અને ફાયર સેફ્ટી સિસ્ટમની વ્યવસ્થા કરવામાં આવશે. સાથે જ, ઊર્જાની જરૂરિયાતને પહોંચી વળવા સોલાર પાવર પ્લાન્ટ જેવી ગ્રીન એનર્જી સુવિધાઓ પણ વિકસાવવામાં આવશે.
આમ, સાબરમતી રેલવે સ્ટેશનનું રિડેવલપમેન્ટ પૂર્ણ થયા બાદ અમદાવાદના રેલવે મુસાફરોને વધુ સુવિધાજનક માળખું, આધુનિક સુરક્ષા વ્યવસ્થા અને પરિવહનનાં વિવિધ સાધનો સાથે વધુ સારી કનેક્ટિવિટીનો લાભ મળવાની અપેક્ષા છે. માર્ચ 2027 સુધીમાં પ્રોજેક્ટ પૂર્ણ કરવાનું લક્ષ્ય રાખવામાં આવ્યું છે.
