અલંગ શિપબ્રેકિંગ યાર્ડમાં ફરજ બજાવતા કર્મચારીઓ કાળનો કોળિયો બન્યા; 6નાં ઘટનાસ્થળે મોત, ગંભીર રીતે ઘવાયેલા એકનું સારવાર દરમિયાન થયું મૃત્યુ
ભાવનગર જિલ્લાના ત્રાપજ નજીક 6 ઓક્ટોબરના રોજ ભયાનક માર્ગ અકસ્માત સર્જાયો હતો. પૂરપાટ ઝડપે આવી રહેલી એક કાર રસ્તા પર ઊભેલા ટ્રેલરની પાછળ ધડાકાભેર ઘૂસી જતાં કારમાં સવાર સાત લોકોનાં મોત નીપજ્યાં હતાં. અકસ્માત એટલો ગંભીર હતો કે છ વ્યક્તિઓએ ઘટનાસ્થળે જ જીવ ગુમાવ્યો હતો, જ્યારે ગંભીર રીતે ઈજાગ્રસ્ત થયેલા એક વ્યક્તિનું હોસ્પિટલમાં સારવાર દરમિયાન મોત થયું હતું.
અલંગના કર્મચારીઓનાં મોતથી શોકનું મોજું
પ્રાપ્ત માહિતી અનુસાર, અકસ્માતમાં જીવ ગુમાવનારા તમામ લોકો અલંગ શિપબ્રેકિંગ યાર્ડના બે અલગ-અલગ પ્લોટમાં ફરજ બજાવતા સ્ટાફના સભ્યો હતા. આ દુર્ઘટનામાં વિજય, સાધુ, જિગ્નેશ, ભાર્ગવ, હિરેન અને યોગેશનાં ઘટનાસ્થળે જ મોત થયાં હતાં. જ્યારે જયેશ નામનો વ્યક્તિ ગંભીર રીતે ઈજાગ્રસ્ત થયો હતો.
અકસ્માાત બાદ જયેશને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. જોકે, તબીબોના પ્રયાસો છતાં સારવાર દરમિયાન તેનું પણ મોત નીપજ્યું હતું. આમ, આ ગમખ્વાર અકસ્માતમાં કુલ સાત લોકોએ જીવ ગુમાવતાં મૃતકોના પરિવારો પર આભ તૂટી પડ્યું હતું.
પોલીસે તપાસ હાથ ધરી
અકસ્માાતની જાણ થતાં જ સ્થાનિક પોલીસનો કાફલો ઘટનાસ્થળે પહોંચી ગયો હતો. પોલીસે જરૂરી કાર્યવાહી હાથ ધરી મૃતદેહોને પોસ્ટમોર્ટમ માટે હોસ્પિટલ ખસેડ્યા હતા. અકસ્માત કયા સંજોગોમાં સર્જાયો અને કાર ટ્રેલર પાછળ કેવી રીતે ઘૂસી ગઈ તે અંગે તપાસ હાથ ધરવામાં આવી છે.
એક જ અકસ્માતમાં સાત લોકોનાં મોતના સમાચારથી અલંગ શિપબ્રેકિંગ યાર્ડ સહિત સમગ્ર વિસ્તારમાં શોકની લાગણી પ્રસરી ગઈ છે. મૃતકોના પરિવારજનો અને પરિચિતોમાં ભારે અરેરાટી જોવા મળી રહી છે.
