પટણાથી અમદાવાદ આવી રહેલી ઈન્ડિગોની ફ્લાઇટ બુધવારે ખરાબ હવામાન વચ્ચે આકાશીય વીજળીની ઝપેટમાં આવી હતી. આશરે 17 હજાર ફૂટની ઊંચાઈએ વીજળી પડતાં વિમાનના આગળના ભાગ એટલે કે નોઝને નુકસાન થયું હતું. જોકે, પાયલોટે સમયસૂચકતા દાખવીને વિમાનનું લખનઉ એરપોર્ટ પર સુરક્ષિત લેન્ડિંગ કરાવ્યું હતું.
મળતી માહિતી મુજબ, ઈન્ડિગોની ફ્લાઇટે બુધવારે બપોરે 3:10 વાગ્યે પટણા એરપોર્ટથી અમદાવાદ માટે ઉડાન ભરી હતી. દરમિયાન આશરે 17 હજાર ફૂટની ઊંચાઈએ વિમાન આકાશીય વીજળીની ઝપેટમાં આવ્યું હતું. વિમાનમાં તે સમયે 150 મુસાફરો સવાર હતા અને તમામ સુરક્ષિત હોવાનું જાણવા મળ્યું છે.
વીજળી પડ્યા બાદ વિમાનમાં તકનીકી સમસ્યા સર્જાતા પાયલોટે તેને સાંજે 4:05 વાગ્યે લખનઉ એરપોર્ટ પર સુરક્ષિત રીતે લેન્ડ કરાવ્યું હતું. ત્યારબાદ ઈન્ડિગો દ્વારા મુસાફરો માટે અન્ય વિમાનની વ્યવસ્થા કરવામાં આવી હતી અને તમામ મુસાફરોને સાંજે 6:22 વાગ્યે અમદાવાદ માટે રવાના કરવામાં આવ્યા હતા.
હાલ ક્ષતિગ્રસ્ત વિમાનની ટેકનિકલ તપાસ માટે એન્જિનિયરોની ટીમ દ્વારા નિરીક્ષણ કરવામાં આવી રહ્યું છે.
અગાઉ પણ ઈન્ડિગોના વિમાન પર વીજળી પડી હતી
વિમાનની બાહ્ય સપાટી એવી રીતે ડિઝાઇન કરવામાં આવે છે કે વીજળીનો કરંટ મુસાફરો સુધી પહોંચતો નથી. આ અગાઉ 19 જૂન, 2026ના રોજ કોલકાતા એરપોર્ટ પર પાર્ક કરેલા ઈન્ડિગોના વિમાન પર પણ આકાશીય વીજળી પડી હતી. તે સમયે વિમાનમાં સવાર 141 મુસાફરોનો પણ બચાવ થયો હતો.
