ગાંધીનગર ખાતે મુખ્યમંત્રી ભૂપેન્દ્ર પટેલની અધ્યક્ષતામાં મળેલી રાજ્ય કેબિનેટની બેઠકમાં રાજ્યના ગ્રામ સેવકોના હિતમાં મહત્ત્વપૂર્ણ નિર્ણય લેવામાં આવ્યો છે. કૃષિ વિભાગ હેઠળ કાર્યરત ગ્રામ સેવકોના માસિક પ્રવાસ ભથ્થામાં રૂ. 850નો વધારો કરીને રૂ. 1,850થી વધારીને રૂ. 2,700 કરવામાં આવ્યું છે.
પ્રવક્તા મંત્રી જીતુ વાઘાણીએ જણાવ્યું હતું કે, રાજ્યમાં હાલ આશરે 2,900 ગ્રામ સેવકો કાર્યરત છે. એક ગ્રામ સેવકને સરેરાશ ચારથી પાંચ ગ્રામ પંચાયતો હેઠળ આવતા ગામોમાં નિયમિત ક્ષેત્રિય પ્રવાસ કરવાનો હોય છે. આ કામગીરીને ધ્યાનમાં રાખીને પ્રવાસ ભથ્થામાં વધારો કરવાનો નિર્ણય લેવાયો છે.
ગ્રામ સેવકો રાજ્ય સરકાર અને ખેડૂતો વચ્ચેની મહત્ત્વપૂર્ણ કડી તરીકે કામગીરી કરે છે. ખેડૂતોને સરકારની વિવિધ કૃષિલક્ષી યોજનાઓ, સહાય અને અન્ય સેવાઓનો લાભ સરળતાથી મળી રહે તે માટે તેઓ ગ્રામ્ય સ્તરે સતત કાર્યરત રહે છે. નવા નિર્ણયથી ગ્રામ સેવકોને પ્રવાસ ખર્ચમાં રાહત મળશે.
