આચાર્યની લેખિત મંજૂરી ફરજિયાત; મુલાકાતીઓએ રજિસ્ટરમાં નોંધ કરાવવી પડશે
વિશ્વના વિવિધ દેશોમાં વિદ્યાર્થી આંદોલનો અને શૈક્ષણિક મુદ્દાઓને લઈને ચાલી રહેલી ચર્ચાઓ વચ્ચે ગુજરાત સરકારે શાળાઓની સુરક્ષા અને વિદ્યાર્થીઓની ગોપનીયતા જાળવવા મહત્ત્વપૂર્ણ નિર્ણય લીધો છે. રાજ્યના શિક્ષણ વિભાગ દ્વારા જારી કરાયેલા પરિપત્ર મુજબ, શાળામાં પ્રવેશતા અનધિકૃત વ્યક્તિઓએ આચાર્ય અથવા સંસ્થાના વડાની લેખિત મંજૂરી લેવી ફરજિયાત રહેશે. સરકારી કામકાજ માટે આવતા અધિકારીઓને આ નિયમમાંથી મુક્તિ આપવામાં આવી છે.
નવા નિયમ મુજબ, શાળામાં પ્રવેશતા દરેક મુલાકાતીએ રજિસ્ટરમાં પોતાની વિગતો નોંધાવવી પડશે. આચાર્યની મંજૂરી વિના મુલાકાતીઓ શાળાની લેબોરેટરી, લાઇબ્રેરી, હોસ્ટેલ, રમતગમતનાં મેદાનો અથવા વિદ્યાર્થીઓની પ્રવૃત્તિઓ ચાલતી હોય તેવા સ્થળોએ જઈ શકશે નહીં.
આ ઉપરાંત, મંજૂરી વિના વિદ્યાર્થીઓ, શિક્ષકો અથવા શાળાની પ્રવૃત્તિઓની ફોટોગ્રાફી, વીડિયો રેકોર્ડિંગ, ઇન્ટરવ્યૂ, ઑડિયો રેકોર્ડિંગ અને લાઇવ સ્ટ્રીમિંગ કરવા પર પ્રતિબંધ મૂકવામાં આવ્યો છે. કાયદેસર હેતુ માટે જરૂરી મંજૂરી મળ્યા બાદ જ આવી પ્રવૃત્તિઓ કરી શકાશે.
શાળા સત્તાધિકારીઓએ એ પણ સુનિશ્ચિત કરવાનું રહેશે કે વિદ્યાર્થીઓનાં ફોટા, વીડિયો અથવા વ્યક્તિગત માહિતીનો સંગ્રહ, પ્રકાશન કે પ્રસાર તેમની ગોપનીયતા, ગૌરવ અને સુરક્ષાને નુકસાન પહોંચાડે તે રીતે ન થાય.
તાજેતરના સમયમાં વિવિધ શૈક્ષણિક મુદ્દાઓને લઈને વિદ્યાર્થીઓનાં આંદોલનો અને વિરોધ પ્રદર્શનો ચર્ચામાં રહ્યા છે. આવા સંજોગોમાં શાળાઓમાં સુરક્ષા વ્યવસ્થા મજબૂત કરવા અને અનધિકૃત પ્રવૃત્તિઓ અટકાવવા આ નિર્ણય લેવામાં આવ્યો હોવાનું માનવામાં આવે છે.
