એશિયા પેસિફિક યોગાસન સ્પોર્ટ્સ ચેમ્પિયનશિપમાં ગોલ્ડ મેડલ સાથે ટ્રોફી મેળવી, એકપાદ રાજકપોત આસન 1 કલાક 19 મિનિટ સુધી કરી ગિનીસ વર્લ્ડ રેકોર્ડ પણ નોંધાવ્યો
સુરત: ભારતીય સંસ્કૃતિ અને યોગપરંપરાનું આંતરરાષ્ટ્રીય સ્તરે ગૌરવ વધારતી સિદ્ધિ સુરતના વિદ્યાર્થી શુભમ દિપકભાઈ પટોળિયાએ હાંસલ કરી છે. વેડરોડ સ્થિત શ્રી સ્વામિનારાયણ ગુરુકુલ વિદ્યાલયમાં અભ્યાસ કરતા શુભમે થાઇલેન્ડની રાજધાની બેંગકોક ખાતે યોજાયેલી ‘4th UYSF Asia Pacific Yogasan Sports Championship-2026’માં જુનિયર બોયઝ વિભાગમાં ઉત્કૃષ્ટ પ્રદર્શન કરીને ‘ચેમ્પિયન ઓફ ધ ચેમ્પિયન્સ’નો ખિતાબ જીત્યો છે. આ સાથે તેણે ગોલ્ડ મેડલ અને ટ્રોફી મેળવી ભારત, ગુજરાત અને સુરતનું નામ આંતરરાષ્ટ્રીય સ્તરે રોશન કર્યું છે.
બેંગકોકમાં યોજાયેલી આ આંતરરાષ્ટ્રીય સ્પર્ધામાં ભારત સહિત થાઇલેન્ડ, મલેશિયા, શ્રીલંકા, વિયેતનામ, ચીન, બાંગ્લાદેશ, હોંગકોંગ, મકાઉ, સિંગાપોર, ઇન્ડોનેશિયા અને મંગોલિયા સહિતના દેશો તથા પ્રદેશોના યોગાસન સ્પર્ધકોએ ભાગ લીધો હતો. વિવિધ દેશોના પ્રતિભાશાળી ખેલાડીઓ વચ્ચે યોજાયેલી આ સ્પર્ધામાં શુભમે પોતાની પ્રતિભા, એકાગ્રતા, શિસ્ત અને સઘન અભ્યાસના બળે વિશિષ્ટ સફળતા મેળવી હતી.
250 જેટલા ખેલાડીઓ વચ્ચે મેળવી વિશિષ્ટ સિદ્ધિ
આંતરરાષ્ટ્રીય સ્પર્ધામાં ભારતનું પ્રતિનિધિત્વ કરવા દેશનાં વિવિધ રાજ્યોમાંથી કુલ 74 ખેલાડીઓની પસંદગી કરવામાં આવી હતી. આ ટીમમાં ગુજરાતના પાંચ ખેલાડીઓનો સમાવેશ થયો હતો, જેમાંથી ચાર ખેલાડીઓ સુરતના હતા. કોચ રવિભાઈ ચૌહાણના માર્ગદર્શન હેઠળ ખેલાડીઓએ નિયમિત અભ્યાસ અને સઘન મહેનત દ્વારા સ્પર્ધા માટે તૈયારી કરી હતી.
જુનિયર બોયઝ વિભાગમાં ‘ચેમ્પિયન ઓફ ધ ચેમ્પિયન્સ’નો ખિતાબ મેળવવા આશરે 250 ખેલાડીઓ વચ્ચે સ્પર્ધા યોજાઈ હતી. આ કઠિન સ્પર્ધામાં શુભમ પટોળિયાએ પોતાની યોગક્ષમતા અને સંતુલનનું ઉત્કૃષ્ટ પ્રદર્શન કરીને સર્વોચ્ચ સ્થાન પ્રાપ્ત કર્યું હતું. તેની આ સિદ્ધિથી શાળા પરિવાર, વાલીઓ અને સુરતના રમતપ્રેમીઓમાં આનંદની લાગણી પ્રસરી છે.
એકપાદ રાજકપોત આસન કરીને ગિનીસ વર્લ્ડ રેકોર્ડ નોંધાવ્યો
શુભમ પટોળિયાની સિદ્ધિમાં વધુ એક ગૌરવપૂર્ણ બાબત એ છે કે તેણે ‘એકપાદ રાજકપોત આસન’ 1 કલાક 19 મિનિટ અને 16 સેકન્ડ સુધી કરીને ગિનીસ વર્લ્ડ રેકોર્ડ પણ નોંધાવ્યો હોવાનું ગુરુકુલ દ્વારા જણાવાયું છે. લાંબા સમય સુધી મુશ્કેલ યોગાસન જાળવી રાખવા માટે શારીરિક ક્ષમતા, માનસિક એકાગ્રતા, સંતુલન અને સતત અભ્યાસ જરૂરી છે. શુભમની આ સિદ્ધિ યોગક્ષેત્રે તેની મહેનત અને સમર્પણને દર્શાવે છે.
ગુરુકુલની યોગપરંપરાનું ગૌરવ વધાર્યું
શ્રી સ્વામિનારાયણ ગુરુકુલમાં વર્ષોથી વિદ્યાર્થીઓને યોગાસન શીખવવાની પરંપરા જાળવવામાં આવે છે. ગુરુકુલના જણાવ્યા અનુસાર, ભારતની આઝાદી બાદ વર્ષ 1948માં ગુરુદેવ શાસ્ત્રીજી મહારાજ શ્રી ધર્મજીવનદાસજી સ્વામીએ રાજકોટમાં ગુરુકુલની સ્થાપના કરી હતી. ત્યારથી વિદ્યાર્થીઓના શારીરિક અને માનસિક વિકાસ માટે પ્રાતઃકાળે નિયમિત યોગાસનના અભ્યાસને મહત્ત્વ આપવામાં આવે છે.
આ પ્રસંગે શ્રી પ્રભુ સ્વામીએ જણાવ્યું હતું કે યોગ માત્ર શારીરિક કસરત નથી, પરંતુ તે શિસ્ત, એકાગ્રતા, આત્મવિશ્વાસ અને સંસ્કારોના ઘડતરનું માધ્યમ પણ છે. શુભમની આંતરરાષ્ટ્રીય સફળતા ગુરુકુલની યોગપરંપરા, શિક્ષકોના માર્ગદર્શન અને વિદ્યાર્થીની સતત મહેનતનું પ્રેરણાદાયી પરિણામ છે.
શુભમનું સન્માન, ગુરુકુલ પરિવારમાં ખુશીનો માહોલ
શુભમ પટોળિયાની આ સિદ્ધિ બદલ ગુજરાતના રાજ્યપાલ આચાર્ય દેવવ્રતજી, નાયબ મુખ્યમંત્રી હર્ષ સંઘવી, સુરતના નાયબ પોલીસ કમિશનર રાજદીપસિંહ નકુમ સહિતના મહાનુભાવો દ્વારા શુભેચ્છાઓ પાઠવવામાં આવી હોવાનું ગુરુકુલ તરફથી જણાવાયું છે. ગુરુકુલના ગુરુવર્ય દેવકૃષ્ણદાસજી મહંત સ્વામી, દેવપ્રસાદદાસજી સ્વામી, ધર્મવલ્લભદાસજી સ્વામી, શાળા સંચાલક ભક્તિનયદાસજી, શ્વેતવૈકુંઠદાસજી સ્વામી, આચાર્ય અરવિંદભાઈ ઠેસિયા, આચાર્ય ધર્મેશભાઈ સલીયા, યોગશિક્ષક રવિ ચૌહાણ તથા શિક્ષકગણ અને વિદ્યાર્થીઓએ પણ શુભમને અભિનંદન પાઠવી તેનું સન્માન કર્યું હતું.
શુભમ પટોળિયાની આ આંતરરાષ્ટ્રીય સફળતાથી સુરત અને ગુજરાતનું ગૌરવ વધ્યું છે. તેની સિદ્ધિ અન્ય વિદ્યાર્થીઓને પણ યોગ, નિયમિત અભ્યાસ, શિસ્ત અને સમર્પણ દ્વારા જીવનમાં ઊંચાં શિખરો સર કરવા પ્રેરણા પૂરી પાડશે.
