આંબેડકરનગરમાં મીની હોસ્પિટલ જેવું ક્લિનિક ચલાવતો હોવાનો ખુલાસો; SOGએ રૂ. 94,258ની દવાઓ અને મેડિકલ સાધનો કબજે કર્યાં
રાજકોટ, તા. 24: રાજકોટના આંબેડકરનગર વિસ્તારમાં હોમિયોપેથીક ડિગ્રીના આધારે એલોપેથીક દવાઓ આપી દર્દીઓની સારવાર કરવાના આક્ષેપસર સ્પેશિયલ ઑપરેશન ગ્રુપ (SOG)એ એક શખસને ઝડપી પાડ્યો છે. પોલીસના જણાવ્યા મુજબ, આરોપી છેલ્લા 28 વર્ષથી ક્લિનિક ચલાવતો હતો અને ત્યાં બેડની વ્યવસ્થા કરીને મીની હોસ્પિટલ જેવી સારવાર આપતો હતો. દરોડા દરમિયાન પોલીસે રૂ. 94,258ની એલોપેથીક દવાઓ, ઇન્જેક્શન, નીડલ સહિતનો મેડિકલ સામાન કબજે કર્યો હતો.
બાતમીના આધારે SOGનો દરોડો
પોલીસની વિગતો અનુસાર, SOGના PI એન.બી. ચૌધરીના માર્ગદર્શન હેઠળ PSI એમ.વી. જાડેજા અને તેમની ટીમ પેટ્રોલિંગમાં હતાં. આ દરમિયાન હેડ કોન્સ્ટેબલ હરદેવસિંહ જાડેજા, ધર્મેન્દ્રસિંહ ઝાલા, યોગરાજસિંહ ગોહિલ અને કોન્સ્ટેબલ અનોપસિંહ ઝાલાને બાતમી મળી હતી કે આંબેડકરનગર શેરી નંબર-1માં ‘જનરલ પોલી ક્લિનિક’ના નામે એક શખસ એલોપેથીક ડિગ્રી વિના દર્દીઓને તપાસીને દવાઓ આપી રહ્યો છે.
બાતમીના આધારે પોલીસે ક્લિનિકમાં દરોડો પાડ્યો હતો. ત્યાં હાજર શખસની પૂછપરછ કરતાં તેનું નામ વાજસુર ઉર્ફે વિજય આપા સુરૂ (ઉંમર 65 વર્ષ) હોવાનું જાણવા મળ્યું હતું. તે રાજકોટના કૃષ્ણનગર મેઇન રોડ પર આવેલી ગીતાંજલિ સોસાયટીમાં રહેતો હોવાનું અને મૂળ ગોંડલના બિલડી ગામનો રહેવાસી હોવાનું પોલીસે જણાવ્યું હતું.
હોમિયોપેથીક ડિગ્રી, પરંતુ એલોપેથીક દવાઓનો ઉપયોગ
ક્લિનિકની તપાસ દરમિયાન ટેબલ પર ગોળીઓના અલગ-અલગ ડબ્બા, સોફા પર તથા ખાનાંમાં વિવિધ દવાઓ અને તબીબી સારવારનાં સાધનો મળી આવ્યાં હતાં. મેડિકલ પ્રેક્ટિસ અંગેની ડિગ્રી પૂછવામાં આવતાં આરોપીએ પોતાની પાસે હોમિયોપેથીક ડિગ્રી હોવાનું જણાવ્યું હતું.
સાથે આવેલા મેડિકલ ઓફિસરે દવાઓની તપાસ કરતાં તે એલોપેથીક હોવાનું જણાયું હતું. પોલીસના જણાવ્યા મુજબ, આરોપીએ હોમિયોપેથીક ડિગ્રી હોવા છતાં દર્દીઓને એલોપેથીક દવાઓ આપતો હોવાનું કબૂલ્યું હતું. તેણે ધોરણ-12 પછી હોમિયોપેથીનો ડિપ્લોમા કોર્સ કર્યો હોવાનું પણ જણાવ્યું હતું.
પોલીસે ક્લિનિકમાંથી કુલ રૂ. 94,258ની દવાઓ, ઇન્જેક્શન, નીડલ અને અન્ય મેડિકલ સાધનો કબજે કરીને આરોપી સામે ગુનો નોંધી કાર્યવાહી હાથ ધરી છે. આ કેસની વધુ તપાસ માલવિયાનગર પોલીસ કરી રહી છે.
28 વર્ષ સુધી આરોગ્ય તંત્રની નજર કેમ ન પડી?
આ ઘટનાએ રાજકોટ મહાનગરપાલિકાના આરોગ્ય તંત્રની કામગીરી સામે પણ સવાલો ઊભા કર્યા છે. પોલીસના જણાવ્યા મુજબ, આરોપી લાંબા સમયથી ક્લિનિક ચલાવતો હતો અને ત્યાં નર્સિંગ સહિતનો સ્ટાફ પણ રાખતો હતો. ત્યારે આટલા વર્ષો સુધી આવી પ્રવૃત્તિ ચાલુ રહી હોવા છતાં સંબંધિત તંત્રનું ધ્યાન કેમ ન ગયું તે મુદ્દે ચર્ચા શરૂ થઈ છે.
શહેરમાં અન્ય સ્થળોએ પણ યોગ્ય લાયકાત અને જરૂરી મંજૂરી વિના તબીબી સારવાર આપવામાં આવતી હોય તો તેની તપાસ કરવાની જરૂરિયાત આ ઘટનાએ ઉજાગર કરી છે. હવે મહાનગરપાલિકાનું આરોગ્ય તંત્ર આવા ક્લિનિકો સામે તપાસ અને કાર્યવાહી કરે છે કે નહીં તેના પર સૌની નજર રહેશે.
