જુલાઈથી વધારાની ગણતરી, સપ્ટેમ્બરના બિલમાં વસૂલાત; ખર્ચનો પારદર્શક હિસાબ જાહેર કરવાની માંગ
અમદાવાદ: ગુજરાતમાં વીજ ગ્રાહકો પર 3.99 ટકાના સરચાર્જને લઈને કોંગ્રેસે રાજ્ય સરકાર અને વીજ કંપનીઓ સામે સવાલો ઉઠાવ્યા છે. ગુજરાત પ્રદેશ કોંગ્રેસ સમિતિના મીડિયા કન્વીનર અને પ્રવક્તા ડૉ. મનીષ દોશીએ મોંઘવારીથી પરેશાન જનતા પર વધારાનો બોજ શા માટે નાખવામાં આવી રહ્યો છે તેવો પ્રશ્ન ઉઠાવી વીજ ઉત્પાદન અને ખરીદીના ખર્ચની વિગતો જાહેર કરવાની માંગ કરી છે.
ડૉ. મનીષ દોશીએ જણાવ્યું હતું કે વીજળીના ઉત્પાદન અને ખરીદીના ખર્ચમાં ખરેખર કેટલો વધારો થયો છે તેનો સ્પષ્ટ હિસાબ સરકાર અને વીજ કંપનીઓએ જાહેર કરવો જોઈએ. કોલસા આધારિત વીજ ઉત્પાદન ઉપરાંત ગેસ, અન્ય વીજ સ્ત્રોતો અને વીજ ખરીદીના ખર્ચમાં થતા ફેરફારોને ધ્યાનમાં રાખીને ફ્યુઅલ એન્ડ પાવર પરચેઝ એડજસ્ટમેન્ટ સરચાર્જ (FPPAS) નક્કી કરવામાં આવે છે, તો પછી ગ્રાહકોને તેની ગણતરીની વિગતો કેમ આપવામાં આવતી નથી?
તેમણે વધુમાં જણાવ્યું હતું કે આ વધારો સપ્ટેમ્બર મહિનાના વીજ બિલથી લાગુ થવાનો છે, પરંતુ તેની ગણતરી 1 જુલાઈથી કરવામાં આવનાર હોવાથી જુલાઈ અને ઑગસ્ટ મહિનાના બિલમાં થયેલા તફાવતની રકમ પણ ગ્રાહકો પાસેથી વસૂલવામાં આવશે.
આ વધારાની અસર ખેતીવાડી વીજ જોડાણોને બાદ કરતાં રહેણાક મકાનો, દુકાનો, કચેરીઓ અને કારખાનાં સહિતના વીજ ગ્રાહકો પર પડશે. મોંઘવારીના સમયમાં વીજ બિલમાં થતો વધારો સામાન્ય પરિવારો અને વેપારીઓના બજેટને અસર કરી શકે છે.
કોંગ્રેસે સરકાર સમક્ષ ત્રણ મુખ્ય સવાલો ઉઠાવ્યા છે: 3.99 ટકા સરચાર્જની ગણતરી કયા ખર્ચના આધારે કરવામાં આવી છે? ગ્રાહકોને વિગતવાર હિસાબ અને પારદર્શક માહિતી ક્યારે આપવામાં આવશે? તેમજ વીજળીના બિલ સામાન્ય પરિવારોને પરવડે તેવાં રહે તે માટે સરકાર શું પગલાં લેશે?
ડૉ. મનીષ દોશીએ જણાવ્યું હતું કે લોકશાહીમાં ગ્રાહકની જવાબદારી માત્ર વીજ બિલ ભરવા પૂરતી મર્યાદિત નથી, પરંતુ તેને બિલમાં વસૂલવામાં આવતી રકમનો હિસાબ માંગવાનો પણ અધિકાર છે. તેમણે સરકાર અને વીજ કંપનીઓ પાસે આ મુદ્દે સ્પષ્ટતા કરવાની માંગ કરી છે.
