600 મુસાફરોની ક્ષમતા ધરાવતી ક્રૂઝથી નર્મદા નદીમાં રિવર ટુરિઝમને મળશે વેગ, મનોરંજન અને કેટરિંગ સહિતની આધુનિક સુવિધાઓ
એકતાનગર: નર્મદા જિલ્લાના એકતાનગર ખાતે આવેલા સ્ટેચ્યુ ઑફ યુનિટીની મુલાકાતે આવતા પ્રવાસીઓ માટે વધુ એક આકર્ષણ ઉમેરાયું છે. સરદાર સરોવર ડેમના નીચેના ભાગમાં નર્મદા નદી પર રૂ. 16 કરોડના ખર્ચે નવી ‘એકતા ક્રૂઝ’ તૈયાર કરવામાં આવી છે. આ આધુનિક ક્રૂઝથી એકતાનગરમાં રિવર ટુરિઝમને વેગ મળવાની સાથે પ્રવાસીઓને નદીમાં સફરનો નવો અનુભવ મળશે.
નવી એકતા ક્રૂઝમાં આધુનિક સુરક્ષા વ્યવસ્થા, આરામદાયક બેઠક, લાઇવ મ્યુઝિક સિસ્ટમ તેમજ કેટરિંગ અને ડાઇનિંગની સુવિધાઓ ઉપલબ્ધ કરાવવામાં આવી છે. ક્રૂઝમાં સામાજિક સમારોહ, ઉજવણી, સાંસ્કૃતિક કાર્યક્રમો અને મનોરંજનલક્ષી પ્રવૃત્તિઓનું આયોજન પણ કરી શકાશે.
આ ક્રૂઝ શરૂ થવાથી નર્મદા નદી અને રિવરફ્રન્ટ આધારિત પ્રવાસન પ્રવૃત્તિઓને પ્રોત્સાહન મળશે. પ્રવાસીઓ માટે ઉપલબ્ધ આકર્ષણોમાં વધારો થતાં તેઓ એકતાનગરમાં વધુ સમય રોકાય તેવી શક્યતા છે. સાથે જ ક્રૂઝ પર કાર્યક્રમો અને ભોજનની વ્યવસ્થા દ્વારા સ્થાનિક સ્તરે રોજગારી તથા આવકની નવી તકો ઊભી થવાની આશા છે.
નવી એકતા ક્રૂઝની મુખ્ય વિશેષતાઓ
– ક્ષમતા: એકસાથે 600 મુસાફરો પ્રવાસ કરી શકશે.
– વિસ્તાર: અંદાજે 380 ચોરસ મીટર વિસ્તારમાં આધુનિક ડિઝાઇન.
– એન્જિન: સંચાલન માટે 400 હોર્સપાવરનું શક્તિશાળી એન્જિન.
– વીજ વ્યવસ્થા: વીજળીની જરૂરિયાત માટે ચાર ડીઝલ જનરેટર સેટ.
– મનોરંજન: લાઇવ મ્યુઝિક અને સાંસ્કૃતિક કાર્યક્રમો માટેની વ્યવસ્થા.
– સલામતી: આગથી રક્ષણ સહિતની આધુનિક સુરક્ષા સુવિધાઓ.
– બેઠક વ્યવસ્થા: મુસાફરો માટે આરામદાયક બેઠકની સુવિધા.
– ખાણીપીણી: ક્રૂઝમાં જ કેટરિંગ અને ડાઇનિંગની વ્યવસ્થા.
નવી એકતા ક્રૂઝથી સ્ટેચ્યુ ઑફ યુનિટીની મુલાકાતે આવતા દેશ-વિદેશના પ્રવાસીઓ માટે પ્રવાસનનો અનુભવ વધુ યાદગાર બનશે અને એકતાનગરની પ્રવાસન સ્થળ તરીકેની ઓળખને વધુ મજબૂતી મળશે.
