ઉત્તર પ્રદેશ અને બિહાર જતી ટ્રેનોમાં વધતી ભીડને પગલે બંને સ્ટેશન પર હોલ્ડિંગ એરિયા તૈયાર; વોકિટોકી અને CCTVથી રેલવે તંત્ર રાખશે નજર
દિવાળી અને છઠ પૂજાના તહેવારો નજીક આવતાં વતન જવા માટે અમદાવાદનાં રેલવે સ્ટેશનો પર મુસાફરોની ભીડ વધવા લાગી છે. ખાસ કરીને ઉત્તર પ્રદેશ અને બિહાર તરફ જતી ટ્રેનોમાં ભારે ધસારો જોવા મળી રહ્યો છે. દિવાળી પહેલાં મહિનાનો પગાર મળ્યા બાદ આ સપ્તાહના અંતમાં વતન જનાર મુસાફરોની સંખ્યામાં વધુ વધારો થવાની શક્યતા છે. આ સ્થિતિને ધ્યાનમાં રાખીને રેલવે તંત્ર દ્વારા અમદાવાદના કાલુપુર અને સાબરમતી રેલવે સ્ટેશન પર વિશેષ હોલ્ડિંગ એરિયા તૈયાર કરવામાં આવ્યા છે.
હોલ્ડિંગ એરિયામાં લાઇટ, પંખા અને પાણીની વ્યવસ્થા
મુસાફરોને ટ્રેનની રાહ જોતી વખતે મુશ્કેલી ન પડે તે માટે હોલ્ડિંગ એરિયામાં લાઇટ, પંખા, પીવાનું પાણી અને ટોઇલેટની અલગથી વ્યવસ્થા કરવામાં આવી છે. ટ્રેનના આગમન પહેલાં મુસાફરોને આ વિસ્તારમાં ક્રમશઃ લાઇનમાં બેસાડવામાં આવશે. ત્યારબાદ ટ્રેન પ્લેટફોર્મ પર પહોંચે ત્યારે મુસાફરોને વ્યવસ્થિત રીતે લાઇનમાં ટ્રેનમાં ચઢાવવામાં આવશે.
આ વ્યવસ્થાનો મુખ્ય હેતુ પ્લેટફોર્મ પર થતી ધક્કામુક્કી અને અફરાતફરી અટકાવવાનો છે. સાથે જ મુસાફરો સરળતાથી પોતાના કોચ સુધી પહોંચી શકે અને ટ્રેનમાં ચઢી શકે તે માટે આયોજન કરવામાં આવ્યું છે.
વોકિટોકી અને CCTVથી ભીડ પર નજર
તહેવારો દરમિયાન મુસાફરોની વધતી સંખ્યાને નિયંત્રિત કરવા માટે રેલવે પ્રોટેક્શન ફોર્સ (RPF) અને ગવર્નમેન્ટ રેલવે પોલીસ (GRP)ની વધારાની ટુકડીઓ તહેનાત કરવામાં આવી રહી છે. RPFના જવાનોને વોકિટોકી આપવામાં આવ્યા છે, જેથી ભીડ વધે અથવા કોઈ સમસ્યા ઊભી થાય તો તાત્કાલિક એકબીજા સાથે સંપર્ક કરીને જરૂરી સૂચનાઓ આપી શકાય.
સ્ટેશન પર લગાવવામાં આવેલા CCTV કેમેરા દ્વારા પણ મુસાફરોની અવરજવર અને ભીડ પર સતત નજર રાખવામાં આવશે. કોઈ ચોક્કસ સ્થળે અચાનક વધુ ભીડ એકઠી થાય તો CCTV મારફતે તેની જાણ થતાં જ વધારાના જવાનોને ત્યાં મોકલી શકાશે.
રેલવેના વિવિધ વિભાગો સંયુક્ત રીતે કામગીરી કરશે
મુસાફરોને હોલ્ડિંગ એરિયામાં લાઇનબદ્ધ બેસાડવાથી લઈને ટ્રેનમાં ચઢાવવા સુધીની કામગીરી રેલવેના કોમર્શિયલ વિભાગ, RPF અને GRP દ્વારા સંયુક્ત રીતે કરવામાં આવશે. વ્યવસ્થા જળવાઈ રહે તે માટે વધારાના સુરક્ષા જવાનોને પણ સ્ટેશન પર ફરજ સોંપવામાં આવી રહી છે.
દિવાળી અને છઠ પૂજા દરમિયાન ખાસ કરીને ઉત્તર પ્રદેશ અને બિહાર તરફ જતી ટ્રેનોમાં મુસાફરોની સંખ્યા વધતી હોવાથી કાલુપુર અને સાબરમતી સ્ટેશન પર વિશેષ તકેદારી રાખવામાં આવશે. હોલ્ડિંગ એરિયા અને વધારાના સુરક્ષા બંદોબસ્તને કારણે ભીડનું સંચાલન વધુ વ્યવસ્થિત બને તેવી રેલવે તંત્રને અપેક્ષા છે.
