મોટાભાગની બેંકોને રિઝર્વ બેંક તરફથી હજુ નોટો મળી નથી; રૂ.10, 20 અને 50ના નાના ચલણની ખાસ અછતથી ગ્રાહકોમાં નારાજગી
દિવાળીના તહેવારને હવે ગણતરીના પાંચ દિવસ બાકી રહ્યા છે, ત્યારે બેંકોમાં નવી ચલણી નોટોનું આગમન ન થતાં ગ્રાહકોમાં નિરાશા જોવા મળી રહી છે. સામાન્ય રીતે દિવાળી પહેલાં નવી કડકડતી નોટો મેળવવા માટે લોકો બેંકોમાં પૂછપરછ અને દોડધામ કરતા હોય છે. જોકે, આ વર્ષે મોટાભાગની બેંકોમાં હજુ નવી નોટો પહોંચી નથી. એકાદ-બે બેંકોને રિઝર્વ બેંક દ્વારા નોટો ફાળવવામાં આવી હોવાની માહિતી છે, પરંતુ તેનું પ્રમાણ પણ ખૂબ ઓછું હોવાનું જાણવા મળ્યું છે.
સામાન્ય રીતે 10થી 12 દિવસ પહેલાં થાય છે ફાળવણી
બેંકિંગ ક્ષેત્રનાં સૂત્રોના જણાવ્યા અનુસાર, સામાન્ય રીતે દિવાળીના 10થી 12 દિવસ પહેલાં રિઝર્વ બેંક નવી નોટોની ફાળવણી શરૂ કરી દેતી હોય છે. ત્યારબાદ દિવાળીના સપ્તાહ પહેલાં બેંકો ગ્રાહકોને નવી નોટોનું વિતરણ કરતી હોય છે. પરંતુ આ વર્ષે એકાદ-બે બેંકોને બાદ કરતાં મોટાભાગની કરન્સી ચેસ્ટ ધરાવતી બેંકોને હજુ સુધી નવી નોટો મળી નથી.
સોમવાર બાદ નવી નોટો ફાળવવામાં આવશે તેવા સંદેશાઓ મળ્યા હોવા છતાં અત્યાર સુધી નોટોનું રેમિટન્સ પહોંચ્યું નથી. સ્થાનિક બેંક અધિકારીઓ હવે રિઝર્વ બેંક દ્વારા નવી નોટો ક્યારે મોકલવામાં આવે છે તેની રાહ જોઈ રહ્યા છે.
રૂ.10, 20 અને 50ની નોટોની વધુ માંગ
બેંકિંગ સૂત્રોના જણાવ્યા મુજબ, નવી નોટોમાં ખાસ કરીને રૂ.10, રૂ.20 અને રૂ.50ના ચલણની ભારે માંગ રહે છે. ગ્રાહકો પણ દિવાળીના તહેવારને ધ્યાનમાં રાખીને નાની કિંમતની નોટો મેળવવા ઇચ્છે છે. જોકે, અત્યાર સુધી એકાદ-બે બેંકોને ફાળવવામાં આવેલી નોટોમાં પણ આ નાના ચલણનું પ્રમાણ ખૂબ ઓછું હોવાનું જાણવા મળ્યું છે.
આગામી દિવસોમાં અન્ય બેંકોને નોટોની ફાળવણી થાય ત્યારે તેમાં રૂ.10, 20 અને 50ની નોટો કેટલી સંખ્યામાં આવે છે તેના પર સૌની નજર રહેશે. નવી નોટો તો ઠીક, કેટલીક જગ્યાએ જૂની નોટોની પણ અછત અનુભવાતી હોવાનું બેંક અધિકારીઓ જણાવી રહ્યા છે.
છેલ્લા દિવસોમાં બેંકો પર વધશે કામગીરીનું ભારણ
જો આગામી એકાદ-બે દિવસમાં નવી નોટો બેંકો સુધી નહીં પહોંચે તો દિવાળીના અંતિમ દિવસોમાં તેનું વિતરણ કરવું મુશ્કેલ બની શકે છે. તહેવાર નજીક આવતાં બેંકોમાં સામાન્ય નાણાકીય વ્યવહારોનું પ્રમાણ પણ વધી જાય છે. આવી સ્થિતિમાં નવી નોટોનું વિતરણ કરવાની વધારાની જવાબદારી બેંકો માટે મુશ્કેલી ઊભી કરી શકે છે.
એક બેંક અધિકારીના જણાવ્યા મુજબ, રિઝર્વ બેંક તરફથી રૂ.10ના સિક્કા મોકલવાની બાંહેધરી આપવામાં આવી છે, પરંતુ નવી નોટોની ફાળવણી અંગે હજુ કોઈ સ્પષ્ટ સંદેશ મળ્યો નથી.
નવી નોટોનું પ્રમાણ ઘટતું હોવાની બેંકરોની ફરિયાદ
દિવાળીના પર્વે નવી નોટો મેળવવાની પરંપરા વર્ષોથી ચાલી આવે છે. વેપારીઓ, ઉદ્યોગકારો અને સામાન્ય નાગરિકો સહિત વિવિધ વર્ગના લોકો નવી નોટો મેળવવા માટે બેંકોમાં સંપર્ક કરતા હોય છે. જોકે, વર્ષો દરમિયાન રિઝર્વ બેંક દ્વારા નવી નોટોની ફાળવણીનું પ્રમાણ ઘટતું હોવાની છાપ બેંકિંગ ક્ષેત્રમાં જોવા મળી રહી છે.
બેંક સૂત્રોના જણાવ્યા મુજબ, અગાઉનાં વર્ષોમાં પણ નવી નોટોની ફાળવણી ઓછી રહેતી હતી. કેટલાક કિસ્સાઓમાં નાની કિંમતની નોટો એટલી ઓછી મળતી હતી કે તમામ ગ્રાહકોને વિતરણ કરવું શક્ય બનતું નહોતું. આવી સ્થિતિમાં કેટલીક બેંકોમાં ગ્રાહકોને આપવાને બદલે બેંકના કર્મચારીઓ વચ્ચે જ નોટોના બંડલનું વિતરણ કરાયું હોવાના કિસ્સા પણ સામે આવ્યા હતા.
હાલમાં ગ્રાહકો નવી નોટો માટે બેંકોમાં પૂછપરછ કરી રહ્યા છે, પરંતુ મોટાભાગની બેંકોમાં નોટો ઉપલબ્ધ ન હોવાથી નારાજગી વ્યક્ત કરી રહ્યા છે. હવે દિવાળી પહેલાં બાકીના દિવસોમાં રિઝર્વ બેંક તરફથી કેટલી અને કયા મૂલ્યની નોટો ફાળવવામાં આવે છે તે જોવાનું રહેશે.
