મોરબી: મોરબીના આંદરણા ગામમાં થયેલી ₹7.36 લાખની રોકડ અને દાગીનાની ચોરીનો ભેદ ઉકેલી પોલીસે મધ્યપ્રદેશની ગેંગના બે સાગરીતોની ધરપકડ કરી છે. તેમની પાસેથી ₹4.53 લાખના સોના-ચાંદીના દાગીના અને મોબાઇલ ફોન સહિતનો મુદ્દામાલ કબજે કરવામાં આવ્યો છે, જ્યારે ત્રણ આરોપી હજુ ફરાર છે.
17-18 જુલાઈ દરમિયાન કમલેશભાઈ બોરાણાના બંધ મકાનનું તાળું તોડી અજાણ્યા શખ્સોએ સોના-ચાંદીના દાગીના, રોકડ રકમ અને અન્ય કિંમતી સામાનની ચોરી કરી હતી. ફરિયાદના આધારે મોરબી તાલુકા પોલીસે તપાસ શરૂ કરી હતી.
તપાસ દરમિયાન એલસીબીને મળેલી બાતમીના આધારે વાંકડા રોડ વિસ્તારમાં ઈંટોના ભઠ્ઠા પર કામ કરતા બે શંકાસ્પદ મજૂરોને ઝડપી પાડવામાં આવ્યા હતા. પૂછપરછમાં તેમણે અન્ય ત્રણ સાગરીતો સાથે મળીને ચોરી આચર્યાની કબૂલાત કરી હતી.
પોલીસે સમરસિંગ ઉર્ફે સમીર કાલુસિંહ દેવકા (33) અને **સુરેશ ઉર્ફે સુરો ભુરસિંગ દેવકા (26)**ની ધરપકડ કરી છે. તપાસમાં અંતરસિંગ મકવાણા, રમેશ દેવકા અને દિલીપ અનારિયા નામના અન્ય ત્રણ આરોપીઓના નામ પણ સામે આવ્યા છે.
પોલીસના જણાવ્યા મુજબ આરોપીઓ મોરબી જિલ્લામાં મજૂરી કામ કરતા હોવાથી ગ્રામ્ય વિસ્તારોના રસ્તાઓથી સારી રીતે પરિચિત હતા. દિવસ દરમિયાન રેકી કરીને બંધ મકાનને નિશાન બનાવી ચોરીને અંજામ આપ્યો હતો.
પકડાયેલા આરોપીઓ અને કબજે કરાયેલ મુદ્દામાલ મોરબી તાલુકા પોલીસને સોંપવામાં આવ્યા છે. ફરાર ત્રણ આરોપીઓને ઝડપી લેવા પોલીસે તપાસનો દોર તેજ કર્યો છે.
