પોલીસ કમિશનર સહિત ઉચ્ચ અધિકારીઓ કરશે ઓચિંતું ચેકિંગ; સ્ટંટ-રેસિંગ અને ગુનાહિત તત્વો સામે કડક કાર્યવાહી
અમદાવાદ: શહેરમાં રાત્રિના સમયે કાયદો-વ્યવસ્થા વધુ મજબૂત બનાવવા પોલીસ કમિશનર અનુપમસિંહ ગેહલોતે ‘મિડનાઈટ એક્શન પ્લાન’ તૈયાર કર્યો છે. આ અંતર્ગત શહેરના 49 પોલીસ સ્ટેશન વિસ્તારમાં ઓળખાયેલા આશરે 150 હોટસ્પોટ પર મધરાતથી મોડી રાત સુધી સઘન નાકાબંધી અને વાહન ચેકિંગ કરવામાં આવશે.
સિંધુભવન રોડ, એસ.જી. હાઇવે, એસ.પી. રિંગ રોડ, સી.જી. રોડ, વસ્ત્રાપુર, સરખેજ, વેજલપુર અને નિકોલ સહિતના વિસ્તારોમાં વિશેષ નજર રાખવામાં આવશે. સ્ટંટ-રેસિંગ, દારૂની મહેફિલો અને અન્ય ગેરકાયદેસર પ્રવૃત્તિઓ સામે કાર્યવાહી કરવામાં આવશે.
આ કામગીરીની માત્ર મેદાની પોલીસ જ નહીં, પરંતુ પોલીસ કમિશનર, જોઈન્ટ પોલીસ કમિશનર અને DCP કક્ષાના અધિકારીઓ પણ ખાનગી વાહનોમાં ઓચિંતું ચેકિંગ કરીને સમીક્ષા કરશે. દરેક પોલીસ સ્ટેશનમાંથી આશરે 5 પેટ્રોલિંગ વાહનો અને 25 પોલીસ કર્મચારીઓ અભિયાનમાં જોડાશે.
બીજી તરફ, ક્રાઈમ બ્રાન્ચે નિકોલ, અમરાઈવાડી અને ગોમતીપુર સહિતના વિસ્તારોમાં આશરે 200 પોલીસ કર્મચારીઓ સાથે મેગા કોમ્બિંગ હાથ ધર્યું હતું. ડ્રગ્સ પેડલર્સ, બુટલેગરો અને હિસ્ટ્રીશીટરો સામેની કાર્યવાહીમાં આશરે 25 ગુના નોંધાયા હોવાનું જાણવા મળ્યું છે.
મિડનાઈટ એક્શન પ્લાન હેઠળ નાર્કોટિક્સ, આર્મ્સ એક્ટ અને પ્રોહિબિશન સંબંધિત ગુનાઓ પર ખાસ નજર રહેશે. રાત્રિના સમયે ગુનાહિત પ્રવૃત્તિઓ પર અંકુશ સાથે શહેરમાં સામાન્ય નાગરિકોની સુરક્ષાની ભાવના મજબૂત કરવાનો પોલીસનો મુખ્ય હેતુ છે.
