100 નવી મિકેનાઇઝ્ડ બોટ ખરીદાઈ, સ્થાનિક નાવિકોને તાલીમ અપાશે
અમદાવાદ: પ્રવાસનપ્રેમીઓ માટે સારા સમાચાર છે. ગુજરાતના પ્રખ્યાત નળસરોવર પક્ષી અભયારણ્યમાં બે વર્ષના લાંબા વિરામ બાદ ફરી બોટિંગ શરૂ થવા જઈ રહ્યું છે. દિવાળી સુધીમાં બોટિંગ સેવા શરૂ કરવાની તૈયારી ચાલી રહી છે. ગુજરાત મેરિટાઇમ બોર્ડ દ્વારા આ માટે 100 મિકેનાઇઝ્ડ એટલે કે એન્જિનવાળી બોટ ખરીદવામાં આવી છે. સાથે જ સ્થાનિક નાવિકોને બોટ સંચાલન અને સલામતી અંગે તાલીમ આપવાની કામગીરી પણ શરૂ કરવામાં આવશે.
જૂન 2024માં વડોદરાના હરણી તળાવમાં બનેલી દુર્ઘટના બાદ નળસરોવરમાં બોટિંગ સંપૂર્ણપણે બંધ કરી દેવાયું હતું. સ્થાનિક રીતે બનાવવામાં આવેલી બોટો લાઇસન્સ અને રજિસ્ટ્રેશનના જરૂરી નિયમો પૂર્ણ કરતી ન હોવાથી બોટિંગ ફરી શરૂ કરવામાં આવ્યું ન હતું.
હવે આ સમસ્યાના ઉકેલ માટે પ્રવાસન વિભાગ અને વન વિભાગ દ્વારા રજિસ્ટર્ડ નાવિકોને સ્ટાન્ડર્ડાઇઝ્ડ બોટ ઉપલબ્ધ કરાવવાનો નિર્ણય લેવાયો છે. અગાઉ લાઇસન્સ ધરાવતા નાવિકોને બોટ ફાળવણીમાં પ્રથમ પ્રાથમિકતા આપવામાં આવશે.
નાવિકોને મળશે રોજગારીનો સહારો
બે વર્ષથી બોટિંગ બંધ રહેતા નળસરોવરના સ્થાનિક નાવિકોની રોજીરોટી પર મોટી અસર પડી હતી. સામાન્ય રીતે એક સીઝનમાં નાવિકો આશરે રૂ.50 હજાર સુધીની કમાણી કરતા હોય છે. પરંતુ સતત બે સીઝન સુધી બોટિંગ બંધ રહેતાં અનેક પરિવારોની આવક પર અસર પડી હતી.
હવે બોટિંગ ફરી શરૂ થતાં સ્થાનિક નાવિકોને રોજગારી અને આવકનો મહત્વપૂર્ણ સ્ત્રોત ફરી ઉપલબ્ધ થશે. સાથે જ નળસરોવરમાં પ્રવાસીઓની સંખ્યામાં પણ વધારો થવાની શક્યતા છે.
ઇકો-ટૂરિઝમને મળશે વેગ
120.82 ચોરસ કિલોમીટરમાં ફેલાયેલું નળસરોવર ગુજરાતનું સૌથી મોટું વેટલેન્ડ પક્ષી અભયારણ્ય છે. અહીં 250થી વધુ પ્રજાતિના સ્થાનિક તેમજ વિદેશથી આવતા પ્રવાસી પક્ષીઓ જોવા મળે છે.
ગુલાબી પેલિકન, ફ્લેમિંગો, સફેદ બગલા, બ્રાહ્મિણી બતક અને હેરોન્સ સહિતના વિવિધ પક્ષીઓ પ્રવાસીઓ માટે મુખ્ય આકર્ષણ છે.
બોટિંગ ફરી શરૂ થવાથી નળસરોવરના ઇકો-ટૂરિઝમને પણ વેગ મળવાની આશા છે. નવી બોટ, તાલીમબદ્ધ નાવિકો અને નિયમનકારી દેખરેખ સાથે પ્રવાસીઓ માટે બોટિંગ વધુ સલામત અને સુવ્યવસ્થિત બનાવવાની દિશામાં તંત્ર આગળ વધી રહ્યું છે.
