ઘરોમાં ઘૂસ્યા વરસાદી પાણીથી લોકો પરેશાન, બાળકોના સ્વાસ્થ્ય અંગે હાઈકોર્ટે વ્યક્ત કરી ચિંતા
પ્રયાગરાજ: સતત વરસાદના કારણે પ્રયાગરાજમાં સર્જાયેલી જળબંબાકારની સ્થિતિને લઈને અલ્હાબાદ હાઈકોર્ટે કડક વલણ અપનાવ્યું છે. હાઈકોર્ટે પ્રશાસનને 24થી 48 કલાકમાં નીચાણવાળા વિસ્તારોમાંથી પાણીનો નિકાલ કરી સ્થિતિ સામાન્ય કરવા આદેશ આપ્યો છે.
મોરી ગેટ અને દરાગંજ સહિતના વિસ્તારોમાં વરસાદી પાણી ભરાઈ જતાં અનેક લોકોના ઘરોમાં પાણી ઘૂસી ગયાની રજૂઆત કોર્ટ સમક્ષ કરવામાં આવી હતી. પાણી ભરાવાની સ્થિતિ ખાસ કરીને બાળકોના સ્વાસ્થ્ય માટે ગંભીર જોખમ ઊભું કરી રહી હોવાનું પણ કોર્ટે નોંધ્યું હતું.
જસ્ટિસ અજીત કુમાર અને જસ્ટિસ ગરિમા પ્રસાદની ખંડપીઠે સમગ્ર મામલે સુનાવણી કરી હતી. દરમિયાન મ્યુનિસિપલ કમિશનરે દરાગંજ વિસ્તારમાં પાઈપલાઈન મારફતે પાણીનો નિકાલ કરવામાં આવી રહેલી મુશ્કેલીઓ અંગે કોર્ટને માહિતગાર કરી હતી.
કોર્ટે અસરગ્રસ્ત વિસ્તારોને આગામી 24થી 48 કલાકમાં જળબંબાકારથી મુક્ત કરવા અને કરાયેલી કામગીરી અંગે સ્ટેટસ રિપોર્ટ રજૂ કરવાનો નિર્દેશ આપ્યો છે. સમગ્ર કામગીરીની જવાબદારી જિલ્લા મેજિસ્ટ્રેટને સોંપવામાં આવી છે.
ભવિષ્યમાં પાણી ભરાય નહીં તે માટે આયોજન માંગ્યું
હાઈકોર્ટે ઉત્તર પ્રદેશ સરકારના સ્થાનિક સંસ્થાઓના નિયામક પાસેથી સોગંદનામું પણ માંગ્યું છે. તેમાં પ્રયાગરાજમાં ભવિષ્યમાં આવી જળબંબાકારની સ્થિતિ ન સર્જાય તે માટે કરવામાં આવનાર કાયમી આયોજન અને કામગીરીની વિગતો રજૂ કરવાની રહેશે.
નોંધનીય છે કે સતત વરસાદથી સર્જાયેલી સ્થિતિ અંગે હાઈકોર્ટે 18 ઓગસ્ટે સ્વમેળે સંજ્ઞાન લીધું હતું. પાણી ભરાવાના કારણે ન્યાયાધીશો સહિત લોકોને કોર્ટ સુધી પહોંચવામાં મુશ્કેલી પડી રહી હોવાની સ્થિતિ પણ સુનાવણી દરમિયાન સામે આવી હતી.
સુનાવણી દરમિયાન મ્યુનિસિપલ કમિશનર સીલમ સૈન તેજા અને જિલ્લા મેજિસ્ટ્રેટ મનીષ કુમાર વર્મા કોર્ટ સમક્ષ હાજર રહ્યા હતા. મ્યુનિસિપલ કમિશનરે જળબંબાકારની સમસ્યાના કાયમી ઉકેલ માટે ‘વ્યાપક યોજના’ તૈયાર કરવામાં આવી હોવાનું કોર્ટને જણાવ્યું હતું.
