‘સલામત સવારી, ST અમારી’ના સૂત્ર વચ્ચે મુસાફરોની હાલાકી, તંત્રની કામગીરી સામે ઉઠ્યા સવાલો
જામનગર: જામનગર-રાજકોટ હાઈવે પર ST બસની કથિત બેદરકારીનો નજારો સામે આવ્યો છે. હાઈવે વચ્ચે જ ST બસ અચાનક બંધ પડી જતા બસમાં સવાર મુસાફરોને જ નીચે ઉતરી બસને ધક્કા મારવાની ફરજ પડી હતી. ઘટનાનો વીડિયો સામે આવતા ST તંત્રની કામગીરી સામે સવાલો ઉઠ્યા છે.
મુસાફરો સુરક્ષિત અને સુવિધાજનક મુસાફરી માટે ભાડું ચૂકવે છે. પરંતુ રસ્તા વચ્ચે બસ બંધ પડી જાય અને તેને ફરી ચાલુ કરવા માટે મુસાફરોને જ ધક્કા મારવા પડે તો બસોની જાળવણી અને વ્યવસ્થા સામે સવાલો ઉઠવા સ્વાભાવિક છે.
**‘સલામત સવારી, ST અમારી’**ના સૂત્ર વચ્ચે મુસાફરોને આવી હાલાકી કેમ ભોગવવી પડે છે? બસોની સમયસર સર્વિસ અને મેન્ટેનન્સ થાય છે કે નહીં? હાઈવે વચ્ચે બસ ખોટકાય ત્યારે મુસાફરોની સુરક્ષા અને વૈકલ્પિક વ્યવસ્થા માટે તંત્ર પાસે શું આયોજન છે? તેવા સવાલો હાલ ચર્ચાઈ રહ્યા છે.
વીડિયો સામે આવ્યા બાદ ST તંત્ર દ્વારા સમગ્ર ઘટનાની તપાસ કરી બસની સ્થિતિ અને મેન્ટેનન્સ અંગે જવાબદારી નક્કી કરવામાં આવે તેવી માંગ ઉઠી છે. સાથે જ ભવિષ્યમાં મુસાફરોને રસ્તા વચ્ચે આવી હાલાકીનો સામનો ન કરવો પડે તે માટે બસોની નિયમિત ચકાસણી અને જાળવણી સુનિશ્ચિત કરવાની જરૂરિયાત પણ વ્યક્ત થઈ રહી છે.
