જેન-ઝી અને જેન-આલ્ફા વચ્ચે શિક્ષણ-પરીક્ષા મુદ્દે વધતી ચર્ચા વચ્ચે સરકારનો નવો ફોકસ; વિદેશી યુનિવર્સિટીઓને ગુજરાતમાં લાવવાની તૈયારી
રાજકોટ: આગામી વર્ષે યોજાનારી વાઈબ્રન્ટ ગુજરાત ગ્લોબલ ઈન્વેસ્ટર્સ સમિટની તૈયારીઓ શરૂ થઈ ગઈ છે. મુખ્યમંત્રી ભૂપેન્દ્ર પટેલ તાજેતરમાં અમેરિકા અને કેનેડાના પ્રવાસે જઈ રોકાણકારોને ગુજરાતમાં યોજાનારી વાઈબ્રન્ટ સમિટમાં ભાગ લેવા આમંત્રણ આપી આવ્યા છે. હવે નાયબ મુખ્યમંત્રી હર્ષ સંઘવીના સંભવિત વિદેશ પ્રવાસની સાથે અધિકારીઓની ટીમ પણ સમિટ પૂર્વેના વિદેશ પ્રવાસ માટે સક્રિય થઈ રહી છે.
સરકાર દ્વારા આવા પ્રવાસો માટે અધિકારીઓના નામ છેલ્લી ઘડી સુધી ગુપ્ત રાખવામાં આવતા હોવાનું ચર્ચાઈ રહ્યું છે. જોકે, આ વખતે વાઈબ્રન્ટ સમિટમાં પ્રથમ વખત શિક્ષણ ક્ષેત્રનો પણ સમાવેશ કરવામાં આવ્યો છે.
જેન-ઝી બાદ હવે જેન-આલ્ફા પર ફોકસ
જેન-ઝી પેઢી દ્વારા શિક્ષણ અને પરીક્ષા વ્યવસ્થાને લઈને ઉઠાવવામાં આવતા વિવિધ પ્રશ્નો વચ્ચે શિક્ષણ ક્ષેત્ર ફરી ચર્ચાના કેન્દ્રમાં આવ્યું છે. ભવિષ્યમાં જેન-આલ્ફા પેઢીની જરૂરિયાતોને ધ્યાનમાં રાખીને શિક્ષણ વ્યવસ્થામાં કેવા ફેરફારો જરૂરી છે તે અંગે પણ સરકાર વિચારણા કરી રહી છે.
વાઈબ્રન્ટ સમિટમાં શિક્ષણ ક્ષેત્રને કઈ રીતે રજૂ કરવું અને તેમાં કયા વિષયોનો સમાવેશ કરવો તે માટે શિક્ષણશાસ્ત્રીઓની ટીમ બનાવવામાં આવી રહી છે. આ ટીમની ભલામણોના આધારે બ્લુપ્રિન્ટ તૈયાર કરવામાં આવશે.
વિદેશી યુનિવર્સિટીઓને ગુજરાતમાં લાવવાનો પ્રયાસ
વાઈબ્રન્ટ સમિટના માધ્યમથી ગુજરાતમાં વિદેશી યુનિવર્સિટીઓ અને આંતરરાષ્ટ્રીય શૈક્ષણિક સંસ્થાઓને આકર્ષવાનો પણ પ્રયાસ કરવામાં આવી રહ્યો છે. ખાસ કરીને ગિફ્ટ સિટી ખાતે વિદેશી યુનિવર્સિટીઓના કેમ્પસ શરૂ થાય તે દિશામાં પણ સરકાર દ્વારા પ્રયાસો કરવામાં આવી રહ્યા છે.
આ ઉપરાંત વિદેશી યુનિવર્સિટીઓના પ્રતિનિધિઓ અને શિક્ષણશાસ્ત્રીઓને વાઈબ્રન્ટ સમિટમાં જોડીને ગુજરાતમાં ઉચ્ચ શિક્ષણ ક્ષેત્રે રોકાણ અને સહયોગની નવી તકો ઊભી કરવાનો પ્રયાસ રહેશે.
મુખ્યમંત્રી માટે ‘આરામ’નો સમય નથી!
ગુજરાતના મુખ્યમંત્રી ભૂપેન્દ્ર પટેલની સતત કાર્યશૈલીને લઈને રાજકીય અને વહીવટી વર્તુળોમાં ચર્ચા જોવા મળી રહી છે. તાજેતરમાં તેઓ વાઈબ્રન્ટ ગુજરાત સમિટની તૈયારીઓના ભાગરૂપે અમેરિકા અને કેનેડાના લાંબા પ્રવાસેથી પરત ફર્યા હતા.
વિદેશ પ્રવાસ દરમિયાન રોકાણકારો સાથે બેઠકો અને મુલાકાતો બાદ ગાંધીનગર પરત ફર્યા પછી અધિકારીઓને આશા હતી કે મુખ્યમંત્રી થોડો આરામ કરશે. પરંતુ, ચર્ચા મુજબ ગાંધીનગર પરત પહોંચ્યા બાદ પણ મુખ્યમંત્રીએ કામકાજમાં લાંબો વિરામ લીધો નહોતો.
મુખ્યમંત્રી નિવાસેથી જ અધિકારીઓને ફોન અને જરૂરી સૂચનાઓ મળવાનું શરૂ થતાં વહીવટી તંત્ર ફરી સક્રિય થઈ ગયું હતું.
વિદેશ પ્રવાસ, બેઠકો અને સતત કાર્યક્રમો વચ્ચે પણ મુખ્યમંત્રીની કામ કરવાની ગતિ યથાવત રહેતાં અધિકારીઓમાં પણ ફરી ‘એલર્ટ મોડ’ જોવા મળ્યો હોવાનું વહીવટી વર્તુળોમાં ચર્ચાઈ રહ્યું છે.
