52 કિલો વાસી-અખાદ્ય જથ્થાનો નાશ, 17 ફૂડ સેમ્પલ લેવાયા; ત્રણ પેઢીને નોટિસ
રાજકોટ: શ્રાવણ માસ દરમિયાન ફરાળી અને બિનફરાળી ખાદ્ય ચીજવસ્તુઓના વેચાણમાં ભેળસેળ કે અખાદ્ય સામગ્રીનો ઉપયોગ ન થાય તે માટે રાજકોટ મહાનગરપાલિકાની આરોગ્ય અને ફૂડ શાખા દ્વારા ચેકિંગ ડ્રાઈવ યથાવત રાખવામાં આવી છે. છેલ્લા ત્રણ દિવસ દરમિયાન શહેરની 44 પેઢીઓમાં તપાસ હાથ ધરવામાં આવી હતી.
ચેકિંગ દરમિયાન વાસી તથા અખાદ્ય જથ્થો મળી આવતા કુલ 52 કિલો માલનો નાશ કરવામાં આવ્યો હતો. આ ઉપરાંત સ્વચ્છતા, સ્ટોરેજ અને લાયસન્સ સંબંધિત ખામીઓ બદલ ત્રણ પેઢીઓને નોટિસ આપવામાં આવી હતી. ફૂડ એક્ટ હેઠળ ફરસાણના 17 નમૂના લેવામાં આવ્યા હતા, જ્યારે વહીવટી ચાર્જ પણ વસૂલવામાં આવ્યો હતો.
મુજકા વિસ્તારમાં 20 કિલો વાસી સામગ્રીનો નાશ
મુજકાના ઓર્બિટ રોડ પર આવેલી કૃષ્ણમ કાઠિયાવાડીમાંથી વાસી સબ્જી, બાંધેલો લોટ અને પ્રિપેર્ડ ફૂડ મળી આવ્યું હતું. ફૂડ શાખાએ કુલ 20 કિલો જથ્થાનો નાશ કર્યો હતો અને રૂ.1,000નો વહીવટી ચાર્જ વસૂલ્યો હતો.
જૈન સ્વીટ નમકીનમાંથી 32 કિલો જથ્થો કબજે
150 ફૂટ રિંગ રોડ પર નાગરિક બેંકવાળી શેરીમાં સદગુરુ બંગલા પાસે આવેલી માં કૃપામાં જૈન સ્વીટ નમકીન એન્ડ સ્નેક્સમાં તપાસ દરમિયાન મકાઈવાળા લોટમાંથી બનાવેલી પેટીસ, મકાઈ સ્ટાર્ચ અને બટેટાના સ્ટાર્ચવાળો માવો મળી આવ્યો હતો.
ફૂડ વિભાગે કુલ 32 કિલો જથ્થાનો નાશ કર્યો હતો. લોટ અને પેટીસના નમૂના પરીક્ષણ માટે લેવામાં આવ્યા હતા. આ ઉપરાંત પેઢી પાસેથી રૂ.2,000નો દંડ વસૂલ કરવામાં આવ્યો હતો.
અન્ય પેઢીમાંથી પણ નમૂના લેવાયા
નાના મવા શાસ્ત્રીનગર સામે આવેલા શ્રી લક્ષ્મી સ્વીટ એન્ડ ફરસાણમાંથી તીખા ગાંઠિયાનો નમૂનો લેવામાં આવ્યો હતો અને રૂ.500નો વહીવટી ચાર્જ વસૂલાયો હતો.
આ ઉપરાંત શહેરના વિવિધ વિસ્તારોમાં આવેલી ફરસાણ અને સ્વીટની દુકાનોમાંથી પાપડી, નાયલોન સેવ, સેવ, સક્કરપારા, તીખા ગાંઠિયા, ગુલાબપુરી, મેથીવાળા ગાંઠિયા, સેવ ગુંદી, ભાવનગરી ગાંઠિયા અને ચંપાકલી ગાંઠિયા સહિતના નમૂના લેવામાં આવ્યા હતા.
આ તમામ નમૂનાઓને ગુણવત્તા ચકાસણી માટે સરકારી લેબોરેટરીમાં મોકલવામાં આવ્યા છે.
29 અન્ય પેઢીઓમાં પણ ચેકિંગ
ફૂડ વિભાગ દ્વારા શહેરની અન્ય 29 પેઢીઓમાં પણ તપાસ કરવામાં આવી હતી. તેમાં ડેરી, પ્રોવિઝન સ્ટોર, ફરસાણની દુકાનો, રેસ્ટોરન્ટ, કાફે, પેટીસ-ભજીયા સેન્ટર અને અન્ય ખાદ્ય સંસ્થાઓનો સમાવેશ થાય છે.
ચેકિંગ દરમિયાન વિભાગે ખાદ્ય સામગ્રીની ગુણવત્તા, સ્વચ્છતા, સ્ટોરેજ, લાયસન્સ અને અન્ય જરૂરી નિયમોનું નિરીક્ષણ કર્યું હતું.
શ્રાવણમાં ફરાળી ખાદ્યસામગ્રી પર ખાસ નજર
શ્રાવણ માસ દરમિયાન ફરાળી ખાદ્યસામગ્રીની માંગ વધતી હોવાથી ફૂડ વિભાગ દ્વારા ખાસ ચેકિંગ હાથ ધરવામાં આવી રહ્યું છે. અખાદ્ય કે વાસી સામગ્રીનું વેચાણ થતું હોવાનું જણાય તો કાયદેસરની કાર્યવાહી કરવામાં આવશે તેવી તંત્ર દ્વારા ચેતવણી આપવામાં આવી છે.
ફૂડ શાખાની આ કાર્યવાહી આગામી દિવસોમાં પણ ચાલુ રહેવાની શક્યતા છે. ખાસ કરીને ફરાળી ફૂડ, ફરસાણ, સ્વીટ્સ અને તૈયાર ખાદ્યસામગ્રીના વેચાણકર્તાઓ પર તંત્રની નજર રહેશે.
