ગુજરાત એસ.ટી. નિગમના ખાનગીકરણના મુદ્દે ભારતીય મજૂર સંઘે ફરી સરકાર સામે વિરોધનો સૂર ઉઠાવ્યો છે. મજૂર સંઘે આક્ષેપ કર્યો છે કે એસ.ટી.નું ખાનગીકરણ માત્ર એક નિર્ણય નથી, પરંતુ રાજ્યના કરોડો મુસાફરો અને હજારો કર્મચારી પરિવારોના ભવિષ્ય સાથે જોડાયેલો પ્રશ્ન છે.
સંઘના જણાવ્યા મુજબ ખાનગીકરણથી અંતરિયાળ અને ઓછા નફાવાળા ગામડાઓના રૂટ પર બસ સેવા ઘટી શકે છે. ખાનગી ઓપરેટરો નફાકારક રૂટને પ્રાધાન્ય આપશે તેવી આશંકા વ્યક્ત કરવામાં આવી છે. સાથે જ ભાડામાં વધારો, મુસાફરોની સુરક્ષા અને તહેવારો દરમિયાન વધતા ભાડા અંગે પણ ચિંતા વ્યક્ત કરવામાં આવી છે.
મજૂર સંઘે એસ.ટી.ને જનસેવાનું માધ્યમ ગણાવી ખાનગી એજન્સીઓની પ્રથા બંધ કરવાની અને નિગમમાં કાયમી ભરતી કરવાની માંગ કરી છે. વર્ષોથી ફરજ બજાવતા બદલી કામદારો, ફિક્સ પગાર અને પાર્ટટાઇમ કર્મચારીઓને કાયમી કરી ન્યાય આપવાની પણ માંગ કરવામાં આવી છે.
સંઘે એવો દાવો પણ કર્યો છે કે હાલમાં ટ્રાવેલ્સ એજન્સીઓ મારફતે 250થી વધુ ખાનગી વોલ્વો બસોનું સંચાલન થઈ રહ્યું છે અને આ માટે ખાનગી પેઢીઓને મોટી રકમ ચૂકવવામાં આવે છે. આ સ્થિતિ વચ્ચે એસ.ટી.ને થતી ખોટ અંગે પણ સરકારે વિચારવું જોઈએ તેવી માંગ કરવામાં આવી છે.
ભારતીય મજૂર સંઘે સરકારને ખાનગીકરણની પ્રક્રિયા અટકાવી કોન્ટ્રાક્ટ પ્રથા બંધ કરવા અને કાયમી ભરતી શરૂ કરવાની ચેતવણી આપી છે. માંગણીઓ નહીં સંતોષાય તો આગામી દિવસોમાં સમગ્ર ગુજરાતમાં ‘નિગમ બચાવો’ અભિયાન અને જનભાગીદારી સાથે આંદોલન શરૂ કરવાની ચીમકી આપવામાં આવી છે.
