શક્તિપીઠ અંબાજી ખાતે યોજાયેલા ભાદરવી પૂનમના મહામેળામાં લાખો ભક્તો ઉમટતાં GSRTCને છલકાતી આવક થઈ છે. માત્ર 6 દિવસમાં એસટી નિગમે ₹9.51 કરોડની જંગી આવક નોંધાવી છે.
મેળા દરમિયાન ભક્તોની અવરજવર માટે GSRTC દ્વારા 30 હજારથી વધુ વધારાની બસ ટ્રીપનું સંચાલન કરવામાં આવ્યું હતું. આ દરમિયાન અંદાજે 13.04 લાખ મુસાફરોએ એસટી બસની સેવા લીધી હતી.
અંબાજી ઉપરાંત અમદાવાદ, વડોદરા, સુરત, રાજકોટ અને ઉત્તર ગુજરાતના વિવિધ ડેપોમાંથી વધારાની બસો દોડાવવામાં આવી હતી. ભક્તોની ભીડને ધ્યાનમાં રાખીને મુખ્ય ડેપો અને હંગામી બસ મથકો પર રાઉન્ડ ધ ક્લોક કામગીરી કરવામાં આવી હતી.
મુસાફરોને લાંબી રાહ ન જોવી પડે તે માટે એસટી વિભાગે ખાસ એક્શન પ્લાન અમલમાં મૂક્યો હતો. ડ્રાઈવર, કંડક્ટર, મિકેનિકલ સ્ટાફ અને સુરક્ષાકર્મીઓ સહિત હજારો કર્મચારીઓએ દિવસ-રાત ફરજ બજાવી હતી.
30 હજારથી વધુ ટ્રીપ અને 13.04 લાખ મુસાફરોના પરિવહન સાથે ₹9.51 કરોડની આવક થતાં ભાદરવી પૂનમનો મેળો GSRTC માટે પણ આર્થિક રીતે નોંધપાત્ર સાબિત થયો છે.
