રાજકોટના અસલમ નામના શખ્સને ડ્રગ્સ પહોંચાડવાનું હતું; અમદાવાદ અને સુરત ક્રાઇમ બ્રાન્ચની સંયુક્ત કાર્યવાહીમાં દિલ્હી-મેરઠના ત્રણ શખ્સો ઝડપાયા
ગુજરાતમાં ડ્રગ્સની હેરાફેરી સામે કાર્યવાહી દરમિયાન અમદાવાદ-વડોદરા એક્સપ્રેસવે પર રૂ. 25.65 કરોડની કિંમતનો હેરોઇન અને મેફેડ્રોનનો જથ્થો ઝડપાયો છે. અમદાવાદ અને સુરત ક્રાઇમ બ્રાન્ચની સંયુક્ત ટીમે રામોલ ટોલનાકા નજીક શંકાસ્પદ કાર રોકીને તપાસ કરતાં ડ્રગ્સ મળી આવ્યું હતું. પોલીસે કારમાં સવાર ત્રણ શખ્સોની ધરપકડ કરી છે. પ્રાથમિક તપાસમાં આ જથ્થો રાજકોટના અસલમ નામના શખ્સને પહોંચાડવાનો હોવાનો ખુલાસો થયો છે.
રૂ. 25.65 કરોડનું હેરોઇન અને મેફેડ્રોન જપ્ત
પોલીસને એક્સપ્રેસવે પર ડ્રગ્સની હેરાફેરી થવાની બાતમી મળી હતી. તેના આધારે અમદાવાદ અને સુરત ક્રાઇમ બ્રાન્ચે સંયુક્ત રીતે વોચ ગોઠવી હતી. આ દરમિયાન રામોલ ટોલનાકા નજીક શંકાસ્પદ કારને અટકાવી તપાસ કરતાં મોટા પ્રમાણમાં નશીલા પદાર્થો મળી આવ્યા હતા.
પોલીસના જણાવ્યા મુજબ, જપ્ત કરાયેલા જથ્થામાં રૂ. 22.65 કરોડની કિંમતનું 4.531 કિલોગ્રામ હેરોઇન અને આશરે રૂ. 2.99 કરોડની કિંમતનું મેફેડ્રોન હોવાનું જણાવાયું છે. બંને જથ્થાની કુલ કિંમત રૂ. 25.65 કરોડ આંકવામાં આવી છે. પોલીસે ડ્રગ્સ ઉપરાંત કાર અને છ મોબાઇલ ફોન પણ કબજે કર્યા છે.
દિલ્હી અને મેરઠના ત્રણ આરોપીઓની ધરપકડ
આ કેસમાં પોલીસે નવી દિલ્હીના કાફીલ અહેમદ ઉર્ફે જાવેદ, દિલ્હીના જતિફલે નૌખેઝ અને મેરઠના મોહમ્મદ ઇમરાન ઉર્ફે રાજાની ધરપકડ કરી છે. પોલીસ તપાસમાં આરોપીઓ અન્ય રાજ્યોમાં પણ ડ્રગ્સની હેરાફેરી સાથે સંકળાયેલા હોવાની વિગતો સામે આવી હોવાનું જણાવાયું છે.
ડ્રગ્સને ઇન્સ્ટન્ટ ડ્રિંક અને રેઇઝિન્સનાં પેકેટોમાં છુપાવીને પાર્સલ સ્વરૂપે પેક કરવામાં આવ્યું હોવાની વિગતો પણ તપાસમાં સામે આવી છે. પોલીસ હવે ડ્રગ્સનો જથ્થો ક્યાંથી લાવવામાં આવ્યો હતો અને તેની પાછળ કોણ-કોણ સંડોવાયેલું છે તે દિશામાં તપાસ કરી રહી છે.
રાજકોટના અસલમની શોધખોળ માટે SOG સક્રિય
પકડાયેલા આરોપીઓની પૂછપરછ દરમિયાન ડ્રગ્સનો જથ્થો રાજકોટના અસલમ નામના શખ્સને પહોંચાડવાનો હોવાની માહિતી સામે આવી છે. આ ખુલાસા બાદ રાજકોટ તરફ તપાસનો દોર લંબાયો છે. રાજકોટ શહેર SOGએ પણ તપાસમાં જોડાઈને અસલમ નામના સંભવિત ડ્રગ્સ પેડલરની ઓળખ અને વિગતોની ચકાસણી શરૂ કરી છે.
પોલીસ હવે ડ્રગ્સનો જથ્થો મંગાવનાર વ્યક્તિ, તેને સપ્લાય કરનાર નેટવર્ક અને રાજસ્થાન સહિત અન્ય રાજ્યોમાં સંકળાયેલા શખ્સોની ભૂમિકાની તપાસ કરી રહી છે. આરોપીઓ વિદેશમાંથી પણ ડ્રગ્સનો જથ્થો મંગાવતા હોવાની કબૂલાત કરી હોવાનું પોલીસ સૂત્રો જણાવી રહ્યાં છે.
ગુજરાતનાં અન્ય શહેરોમાં પણ સપ્લાય થયો હોવાની આશંકા
તપાસ એ દિશામાં પણ આગળ ધપાવવામાં આવી રહી છે કે આરોપીઓ ગુજરાતનાં કયા-કયા શહેરોમાં ડ્રગ્સ પહોંચાડતા હતા અને આ નેટવર્કમાં અન્ય કેટલા લોકો સંડોવાયેલા છે. ડ્રગ્સના મૂળ સ્ત્રોતથી લઈને રાજકોટમાં જથ્થો મેળવનાર વ્યક્તિ સુધીની કડી શોધવા માટે પોલીસ દ્વારા તપાસ તેજ કરવામાં આવી છે.
નોંધ: આરોપીઓ સામેના આક્ષેપો અને તપાસમાં સામે આવેલી વિગતો પોલીસના પ્રાથમિક નિવેદનો પર આધારિત છે. તેમની સંડોવણી અંગેનો અંતિમ નિર્ણય કોર્ટની કાર્યવાહી બાદ જ થશે.
