ચંદી પડવા પહેલાં મહાનગરપાલિકાની 8 ટીમો મેદાનમાં ઉતરી; મોહન મીઠાઈ, રમેશ મીઠાઈ અને વિજય ડેરીમાંથી સેમ્પલ લેવાયાં
સુરતમાં ચંદી પડવાના તહેવારને ધ્યાનમાં રાખીને મહાનગરપાલિકાના આરોગ્ય વિભાગે માવા અને ઘારીનું વેચાણ કરતા એકમો સામે સતત બીજા દિવસે તપાસ અભિયાન હાથ ધર્યું છે. વિવિધ એકમોમાંથી માવા સહિતની ખાદ્ય સામગ્રીનાં સેમ્પલ એકત્ર કરીને લેબોરેટરીમાં પરીક્ષણ માટે મોકલવાની કાર્યવાહી કરવામાં આવી છે.
નવરાત્રિ પૂર્ણ થતાં જ સુરતમાં ચંદી પડવાની ઉજવણીની તૈયારીઓ શરૂ થઈ ગઈ છે. આ તહેવાર દરમિયાન ઘારી અને ભૂસાની મોટા પાયે ખરીદી થતી હોવાથી ખાદ્ય સામગ્રીની ગુણવત્તા જાળવવા આરોગ્ય વિભાગ સક્રિય બન્યો છે.
અગાઉના દિવસે શહેરના વિવિધ ઝોનમાં આવેલી 15 જેટલી દુકાનો અને એકમોમાંથી સેમ્પલ લેવામાં આવ્યાં હતાં. ત્યારબાદ આજે પણ આરોગ્ય વિભાગની આઠ ટીમોએ રાંદેર, અઠવા અને સેન્ટ્રલ ઝોનમાં માવાના વેપારીઓ તથા ઘારીનું વેચાણ કરતા એકમોમાં તપાસ હાથ ધરી હતી.
આ કાર્યવાહી દરમિયાન મોહન મીઠાઈ, રમેશ મીઠાઈ અને વિજય ડેરી સહિતનાં એકમોમાંથી સેમ્પલ એકત્ર કરવામાં આવ્યાં છે. હવે લેબોરેટરીના પરીક્ષણ બાદ ખાદ્ય સામગ્રીની ગુણવત્તા અંગે વધુ સ્પષ્ટતા થશે.
