સેડલા ગામના બોર્ડ પાસે ટ્રક મૂકી ચાલક ફરાર; 34,236 બોટલ વિદેશી દારૂ મળી, ટ્રક પર ખોટી નંબર પ્લેટ લગાવેલી હોવાનું ખુલ્યું
સુરેન્દ્રનગર જિલ્લાના માલવણ-વિરમગામ હાઈવે પર બજાણા પોલીસે વિદેશી દારૂની હેરાફેરી સામે મોટી કાર્યવાહી કરી છે. સેડલા ગામના બોર્ડ પાસે વિદેશી દારૂથી ભરેલો ટ્રક બિનવારસુ હાલતમાં મળી આવતાં પોલીસે તપાસ હાથ ધરી હતી. ટ્રકમાંથી અલગ-અલગ બ્રાન્ડની કુલ 34,236 નાની-મોટી બોટલો મળી આવી હતી. દારૂ અને ટ્રક સહિત પોલીસે રૂ. 1.42 કરોડથી વધુનો મુદ્દામાલ જપ્ત કર્યો છે.
પોલીસનો પીછો થતાં ચાલક ટ્રક છોડીને ફરાર
મળતી માહિતી મુજબ, ખાનગી બાતમીના આધારે બજાણા પોલીસે માલવણ-વિરમગામ હાઈવે પર ટ્રકને રોકવાનો પ્રયાસ કર્યો હતો. જોકે, ટ્રકચાલકે વાહન રોકવાને બદલે પૂરઝડપે ભગાવ્યું હતું. પોલીસે પીછો કરતાં ચાલક સેડલા ગામના બોર્ડ પાસે ટ્રક મૂકીને અંધારાનો લાભ લઈ ફરાર થઈ ગયો હતો.
ત્યારબાદ પોલીસે ટ્રકની તલાશી લેતાં અંદરથી વિદેશી દારૂનો મોટો જથ્થો મળી આવ્યો હતો. પોલીસે તમામ બોટલોનો જથ્થો કબજે કરીને આગળની કાર્યવાહી હાથ ધરી છે.
દારૂની કિંમત રૂ. 1.02 કરોડથી વધુ
ટ્રકમાંથી મળી આવેલી 34,236 બોટલ વિદેશી દારૂની કિંમત રૂ. 1.02 કરોડથી વધુ આંકવામાં આવી છે. હેરાફેરી માટે ઉપયોગમાં લેવાયેલો આશરે રૂ. 40 લાખની કિંમતનો ટાટા 4830 ટ્રક પણ પોલીસે કબજે કર્યો છે. આમ, દારૂ અને ટ્રક સહિત કુલ રૂ. 1.42 કરોડથી વધુનો મુદ્દામાલ જપ્ત કરવામાં આવ્યો છે.
ટ્રક પર ખોટી નંબર પ્લેટ લગાવેલી હોવાનું ખુલ્યું
પોલીસની પ્રાથમિક તપાસમાં ટ્રક પર ખોટી નંબર પ્લેટ લગાવવામાં આવી હોવાનું સામે આવ્યું છે. ટ્રકનો અસલ નંબર ઝારખંડ રાજ્યનો JH-20-H-5568 હોવાનું જાણવા મળ્યું છે. ખોટી નંબર પ્લેટના ઉપયોગથી દારૂની હેરાફેરી કરવામાં આવતી હોવાની દિશામાં પણ પોલીસ તપાસ કરી રહી છે.
હાલ ફરાર ટ્રકચાલકને ઝડપી પાડવા માટે શોધખોળ શરૂ કરવામાં આવી છે. દારૂનો જથ્થો ક્યાંથી લાવવામાં આવ્યો હતો, ક્યાં પહોંચાડવાનો હતો અને આ હેરાફેરીના નેટવર્કમાં અન્ય કોણ સામેલ છે તે અંગે તપાસ ચાલુ છે. ચાલક તથા અન્ય સંડોવાયેલા શખ્સો ઝડપાયા બાદ વધુ વિગતો બહાર આવવાની શક્યતા છે.
