જિલ્લા અદાલતોમાં ફોર્મેટિંગના નવા નિયમો; ટેબલ પર અપાતી કેટલીક અરજીઓને છૂટછાટ
અમદાવાદ: ગુજરાત હાઇકોર્ટે જિલ્લા અદાલતોમાં અરજીઓ અને અન્ય કાનૂની દસ્તાવેજો માટે A4 કદના કાગળ અને ફોર્મેટિંગના નવા નિયમો જાહેર કર્યા છે. અગાઉ મુલતવી રાખવામાં આવેલો આ પરિપત્ર હવે 10 ઓગસ્ટ, 2026થી અમલમાં આવશે.
નવા નિયમ મુજબ જિલ્લા અદાલતોમાં અરજીઓ, અપીલના મેમોરેન્ડમ, દલીલો, આદેશો અને ચુકાદાઓનો ભાગ બનતા દસ્તાવેજો માટે 21 × 29.7 સેમી A4 પેપરનો ઉપયોગ કરવો પડશે. કાગળ ઓછામાં ઓછો 75 GSMનો હોવો જોઈએ અને પ્રિન્ટ બંને બાજુ કરવાની રહેશે.
ગુજરાતી લખાણ માટે 13 પોઈન્ટ અને અંગ્રેજી લખાણ માટે Times New Roman 14 પોઈન્ટ રાખવાનો રહેશે. સામાન્ય લખાણમાં 1.5 લાઇન સ્પેસિંગ અને નિર્ધારિત માર્જિન જાળવવાના રહેશે.
હાઇકોર્ટે સ્પષ્ટ કર્યું છે કે આરોપીની રજૂઆત સમયે ટેબલ પર આપવામાં આવતી મુલતવી, મુક્તિ અને જામીન અરજીઓ, તેમજ જામીન બોન્ડ સંબંધિત કાગળો પર આ નિયમ લાગુ નહીં પડે.
આ ઉપરાંત પોલીસ પેપર્સ, ચાર્જશીટ, પોલીસ રિપોર્ટ, FSL રિપોર્ટ, વકાલતનામા, સોગંદનામા, મૂળ દસ્તાવેજો, નકશા અને યોજનાઓ જેવા દસ્તાવેજોને પણ A4 નિયમમાંથી છૂટછાટ આપવામાં આવી છે.
ગુજરાત હાઇકોર્ટના રજિસ્ટ્રાર જનરલ એસ.ડી. સુથાર દ્વારા 7 ઓગસ્ટ, 2026ના રોજ આ પરિપત્ર પ્રસિદ્ધ કરવામાં આવ્યો છે.
