રાષ્ટ્રીય એકતા દિવસની પૂર્વસંધ્યાએ મા નર્મદાના ચરણોમાં શીશ ઝુકાવ્યું; દેશની સુખાકારી, શાંતિ અને સમૃદ્ધિ માટે કરી પ્રાર્થના
એકતા નગર: સરદાર વલ્લભભાઈ પટેલની 151મી જન્મજયંતિ અને રાષ્ટ્રીય એકતા દિવસની પૂર્વસંધ્યાએ વડાપ્રધાન નરેન્દ્ર મોદીએ એકતા નગરના રેવા તટે આવેલા પુનઃનિર્મિત નર્મદા ઘાટ પર નર્મદા મૈયાની ભવ્ય મહાઆરતીમાં ભાવપૂર્વક ભાગ લીધો હતો. નર્મદા નદીના પવિત્ર કિનારે યોજાયેલી આ આરતીમાં વડાપ્રધાને મા નર્મદાના ચરણોમાં શીશ ઝુકાવી દેશની સુખાકારી, સમૃદ્ધિ, શાંતિ અને ઉત્તરોત્તર વિકાસ માટે પ્રાર્થના કરી હતી.
શંખનાદ અને વૈદિક મંત્રોચ્ચારથી ગુંજી ઊઠ્યો ગોરા ઘાટ
નર્મદા મૈયાની મહાઆરતી દરમિયાન ગોરા ઘાટનો સમગ્ર પરિસર ભક્તિભાવ અને આધ્યાત્મિક ઊર્જાથી ભરાઈ ગયો હતો. શંખનાદ, ડમરુના નાદ, મંત્રોચ્ચાર અને દીપમાળાની ઝળહળતી રોશની વચ્ચે ધાર્મિક વાતાવરણ સર્જાયું હતું. પરંપરાગત વિધિ અને વૈદિક મંત્રોચ્ચાર સાથે યોજાયેલી આરતીમાં વડાપ્રધાન મોદીએ દીપ પ્રજ્વલિત કરી મા નર્મદાની આરાધના કરી હતી.
ગૂગળના ધૂપની સુવાસ અને દીવડાઓના પ્રકાશથી ઘાટ પરિસર દિવ્ય આભાથી ઝળહળી ઊઠ્યો હતો. નર્મદા નદીના પવિત્ર તટે યોજાયેલી આ મહાઆરતીમાં ભક્તિ અને આધ્યાત્મિકતાનો અનોખો સંગમ જોવા મળ્યો હતો.
નર્મદા ઘાટના પુનઃનિર્માણની વિશેષતાઓથી કરાવ્યા માહિતગાર
આ પ્રસંગે સ્ટેચ્યુ ઓફ યુનિટી અને સરદાર સરોવર નર્મદા નિગમના ચેરમેન મુકેશ પુરી, રાજ્યના મુખ્ય સચિવ મનોજકુમાર દાસ તથા અગ્રસચિવ સંજીવ કુમાર સહિતના મહાનુભાવોએ વડાપ્રધાનનું ઉષ્માભર્યું સ્વાગત કર્યું હતું.
સ્ટેચ્યુ ઓફ યુનિટી ઓથોરિટીના મુખ્ય કારોબારી અધિકારી અમિત અરોરાએ વડાપ્રધાનને નર્મદા ઘાટના પુનઃનિર્માણની કામગીરી, તેની વિશેષતાઓ અને અહીં તૈયાર કરવામાં આવેલા આકર્ષક મ્યુરલ્સ અંગે વિસ્તૃત જાણકારી આપી હતી.
મ્યુરલ્સમાં નર્મદા મૈયાની ધાર્મિક અને સાંસ્કૃતિક પરંપરાનું નિરૂપણ
નર્મદા ઘાટ પર તૈયાર કરાયેલા થીમ આધારિત મ્યુરલ્સમાં મા નર્મદાના પ્રાગટ્ય અને નર્મદા પરિક્રમાની પવિત્ર પરંપરાને સુંદર રીતે રજૂ કરવામાં આવી છે. આ મ્યુરલ્સ દ્વારા નર્મદા નદીનું ધાર્મિક, સાંસ્કૃતિક અને ઐતિહાસિક મહત્ત્વ ઉજાગર કરવામાં આવ્યું છે.
રાષ્ટ્રીય એકતા દિવસની ઉજવણી પૂર્વે વડાપ્રધાનની નર્મદા મૈયાની મહાઆરતીમાં ઉપસ્થિતિએ એકતા નગરના આ ધાર્મિક અને સાંસ્કૃતિક કાર્યક્રમને વિશેષ મહત્ત્વ આપ્યું હતું.
