પેપર લીક અને ગેરરીતિના આક્ષેપો વચ્ચે ભાજપ-અભિજીત દીપકે આંદોલનને આપ્યું સમર્થન
રાંચી: ઝારખંડમાં સરકારી ભરતી પરીક્ષાઓમાં ગેરરીતિ, પેપર લીક અને અનિયમિતતાના આક્ષેપોને લઈને વિદ્યાર્થીઓનું આંદોલન હવે રાષ્ટ્રીય સ્તરે ચર્ચાનો વિષય બની રહ્યું છે. NEET પેપર લીક મુદ્દે દિલ્હીના જંતર મંતર પર થયેલા આંદોલન બાદ હવે ઝારખંડમાં પણ મોટા વિરોધ પ્રદર્શનના સંકેત મળી રહ્યા છે.
ઝારખંડ રાજ્ય લોક સેવા આયોગ અને કર્મચારી પસંદગી આયોગની પરીક્ષાઓમાં થયેલી ગેરરીતિના આક્ષેપોને લઈને છેલ્લા છ દિવસથી વિદ્યાર્થીઓ વિરોધ કરી રહ્યા છે. વિદ્યાર્થી નેતા દેવેન્દ્રનાથ મહાતો ઉપવાસ પર બેઠા હતા અને હવે આંદોલનને વધુ વ્યાપક બનાવવાની તૈયારી ચાલી રહી છે.
આંદોલનને રાજકીય સમર્થન મળતાં ભાજપે પણ મેદાનમાં ઉતરવાનો નિર્ણય કર્યો છે. ભાજપનું પ્રતિનિધિમંડળ રાંચી પહોંચી આંદોલનકારીઓને સમર્થન આપશે. ભાજપે ઝારખંડ સરકાર પર નિશાન સાધતા ગેરરીતિ માટે જવાબદારી સ્વીકારવાની અને મુખ્યમંત્રી હેમંત સોરેન પાસે જવાબ માંગ્યો છે.
બીજી તરફ કોકરોચ જનતા પાર્ટીના સ્થાપક અભિજીત દીપકે પણ રાંચી જઈ આંદોલનને ટેકો આપવાની જાહેરાત કરી છે. તેમણે જણાવ્યું કે તેઓ પોતાના સાથીદારો સાથે રાંચી પહોંચી વિદ્યાર્થીઓના હક માટે અવાજ ઉઠાવશે.
ઝારખંડ સરકારે આ મામલે તપાસ ચાલી રહી હોવાનું જણાવ્યું છે અને તપાસ રિપોર્ટ બાદ જરૂરી કાર્યવાહી કરવાની ખાતરી આપી છે. જોકે, વિપક્ષ દ્વારા સરકાર સામે CBI તપાસ અને કડક કાર્યવાહીની માંગ કરવામાં આવી રહી છે.
રાજકારણ નહીં, જનમુદ્દાઓ માટે પ્રેશર ગ્રુપ તરીકે કામ કરીશું: અભિજીત દીપકે
અભિજીત દીપકે જણાવ્યું કે તેમની સંસ્થા કોઈ રાજકીય પક્ષ બનાવવાની યોજના ધરાવતી નથી. તેઓ દેશના મહત્વના મુદ્દાઓ પર પ્રેશર ગ્રુપ તરીકે કામ કરશે.
તેમણે બેરોજગારી, શિક્ષણ વ્યવસ્થા, ઈ-20 પેટ્રોલ સહિતના મુદ્દાઓ પર પણ ચર્ચા કરવાની વાત કરી હતી. તેમના જણાવ્યા મુજબ, લોકોના પ્રશ્નો ઉકેલવા માટે જનઆંદોલન જરૂરી છે.
