ગૃહ વિભાગે રાજકોટ શહેર-ગ્રામ્ય સહિત ગુજરાતભરના વિવિધ પોલીસ એકમોમાં ફરજ બજાવતા કુલ 414 પોલીસ કર્મચારીઓની આંતરજિલ્લા બદલી કરી છે. આ નિર્ણયમાં કર્મચારીઓની વ્યક્તિગત તથા કૌટુંબિક પરિસ્થિતિને પ્રાધાન્ય આપવામાં આવ્યું છે. ખાસ કરીને પતિ-પત્ની બંને સરકારી નોકરીમાં હોય તેવી રજૂઆતો અને અન્ય કૌટુંબિક કારણોને ધ્યાનમાં લેવામાં આવ્યા છે.
બદલીમાં 226 બિનહથિયારી કોન્સ્ટેબલ-લોકરક્ષક, 129 હથિયારધારી કોન્સ્ટેબલ-લોકરક્ષક અને 59 હથિયારધારી તથા બિનહથિયારી હેડ કોન્સ્ટેબલનો સમાવેશ થાય છે. અમદાવાદ, સુરત, વડોદરા, રાજકોટ, ભાવનગર, ગાંધીનગર સહિત વિવિધ શહેરો અને જિલ્લાઓના પોલીસ કર્મચારીઓને નવી જગ્યાએ ફરજ સોંપવામાં આવી છે.
કર્મચારીઓને પરિવાર સાથે રહી ફરજ બજાવવાની તક મળે તે હેતુથી કરવામાં આવેલી આ બદલીને પોલીસ કર્મચારીઓ માટે રાહતરૂપ નિર્ણય માનવામાં આવી રહ્યો છે. બદલી પામેલા કર્મચારીઓએ નિયત સમયમર્યાદામાં નવી જગ્યાએ હાજર થવાનું રહેશે અને ગંભીર તપાસ કે વિભાગીય કાર્યવાહી સાથે સંકળાયેલા કર્મચારીઓ માટે આદેશમાં જરૂરી શરતો રાખવામાં આવી છે.
